95 rentemeester van Bewestenscelt in Zeeland, ende onsen stede van Middelburg, dat sij onse lant van Walcheren also be- wairen van dijkaedsen, hetzij mit inzeten buten of binnen, of in beijdcn, sodatter onse lant mede bewaert en versekert sij, ende ghenen cost dairjegen en sparen, ende dat doen op cost ons ghemeenen lants van Walcheren, ende so wes onse getrouwe raden ende stede voorschreven hierin ordonneren of doen sullen, dat willen wij vaste ende ghestade hebben ende doen houden ghelijc of wij 't selve gedaen hadden, sonder te ghedoghen ijemant dairjegen te doen ende dat sij desen dijc ghemeen houden op des ghemeens lants cost ter tijt toe dat wij selve te lande comen en wijne bewiesen op dieghene, diene houden sullen ende waert dat sake, dat enich van den abt van Middelburg, van den heere van der Vere, van heeren Clase van Borselen, onsen rentemeester voirschreven, buten slants of niet eendrachtich en wairen mit onser stede voir schreven of niet dairbi comen en wilden alst hun onse stede voirschreven liete weten, om dese voirschreven dijckaedse te vorderen ende toe te bringhen, soe hebben wij vorder ghe- machtighet ende bevolen onse stede voirschreven of mitten ghenen, die bi him comen ende moghen overdragen, dat sij onse lant voirschreven diken, versekeren ende bewairen als voirschreven is, ende dat willen wij also vaste ende ghestade houden of wij 't selve gedaen hadden als voirschreven is, ende waer dat sake, dat ijemande in dese voirschreven pointen overhorich waire ende niet doen en wilde bi ordinantie onser raden ende stede voirschreven, soe hebben wij bevolen ende bevelen ernstelic onse stede van Middelburg, dat sij die halen in onsen steen in Middelburg ende dairin houden ter tijt toe dat wij him anders laten weten wes wij dairmede gedaen willen hebben, want wij in desen saken nijemants overhoricheit hebben en willen in gheenre manieren. Dit sal gedueren drie jaer lang na den datum des briefs ende darentenden tot onsen wederseggen. In oirkonde etc. gegeven in Den Haghe 11 dage in Februario anno '95 secundum cursum curiae Hollandiae. Uit Register Memorale B. D„ cas R (Algemeen Rijksarchief), fol. 144.

Tijdschriftenbank Zeeland

Archief | 1933 | | pagina 145