Voert sail ick dit voirs. hoff ende alle syne goeden voerstaen ende verantwoirden op
mijne kost daer des van noode is, ende alle dijcken, dammen, sluysen, watergangen onkost
ende anderen onraidt der selven hoefs ende synen erven ende goeden ther goeder tyt op
mijnen kost maken, ghelden ende dragen sonder enige vanden balyer ende convent voirs.
ofte horen nacomelingen, alsoe dat die balyer ende convent off dat hoff voirs. gheenen
schade ofte ghebreck en lyden.
Ende ick en sail gheenrehande erven off eyghen des selven hoefs bynnen desen jaren voirs.
alyeneren, vercopen, verwysselen, versetten, off in erfpacht uutgeven off anders van onser
oirden the ontvreemden buyten sonderlinge oirlof will, weten ende consent des balyers
ende convents offhore nacomelingen.
Voert sell ick gehouden wesen altijt inder capellen the houden dat weerde heilige sacra
ment ende dat nacht ende dach the belichten nae behoren ende alle heilighe dage inder
capellen misse the doen als des gebueelick is nae mijner devocien off bij eenen anderen
laten doen als ick geen medebrueder onser oirden bij my en hebbe.
Voert soe sell ick gehouden wesen alle jaer in onse convent tho respons the geven ende
the brengen dertich eynckel gouden gulden van voire gewichten ofte die weerde daer
voir, ende die commervrij leveren bynnen den scafferien ons convente t'Utrecht vandes
selven hoefs wegen, die welke ick betalen sell Petri ad cathedram anno vijftienhondert
negen off bynnen veerthiendagen daer nae ombegrepen, ende alser voert jaerlicx opten
selven termijn des voirs. thien jaren om durende.
Ende alsoe dat voirs. huys ende hoff jaerlicx sculdich is uut the reycken drie pondt groot
lossrenthen daer uut vercoft sekers personen nae vermogen segel ende brieve dair van
wesende, die sell ick dese thien jaer lanck jaerlicx mede betalen den ghenen die men die
sculdich is, ten waer saicke dat die balier ende convent of hoer nacomelingen die selve
renthe bynnen den voirs. thien jaren losseden, alsdan sell ick gehouden wesen den balyer
ende convent jaerlicx the respons uut the reycken ende the betalen then termijne voirs.
veertich gouden Rijnsche gulden van voire gewichten paymente voirs. sonder enich ver-
suym dair in the laten geschien. Ick sail oick opsetten capittels kosten, annaten gelden
ende dragen gelycken andere ghehoirsame plegeren der balyen van Utrecht voirs..
Voert sail ick ende die brueder die mit my woent, blyven ende wesen onder visitacien
ende ghehoersaemheit ons genedigen heeren dien meystere van Duytschlandt ende zijnen
nacomelingen, des balyers ende convents off hoer nacomelingen commenduyeren
t'Utrecht inder tijt. Ende soe wanneer onse genedege heere off sijn visitoers, die balyer
ende convent off haer visitoers comen om my ofte mijnen brueder ende dat hoff the visi
teeren, soe sail ick die mit horen ghesynne ende peerden heflick ontfangen, guettelicken
doen ende eenen ygelicken uutrichten nae goeder gewoenten der balyen ende des selven
hoeffs vermogen. Ende wanneer die balyer ende convent off hoer nacomelingen my the
capittel off gespreke scrijven of doen eysschen ende roepen, daer sell ick comen ende
doen ghelijck ander ghehoirsame plegeren der balye van Utrecht voirs.. Ende waert saicke
dat ick in eniger onser oirden penitencie viell, die sell ick guettelick dragen nae wijsinge
ende recht des balyers ende ghemeen convents off hoer nacomelingen ende daer nae
bevelinge gebruijcken off ick nyet in penitencie gevallen en ware.
Mede zynt voirwairden, dat godt verhueden moet, oft open oirloge off die wateren inghin-
gen off dat hoff verbrant worde vanden vyanden dat men dat lant niet gebruycken en
konst, sell staen gansselick ende geheel in handen ons plegheren the verclaeren.
Ende oft saicke waer dat ick mijn respons jaerlicx niet en betaelde opten termijne in
manieren voirs. off enich vanden articulen hier inne begrepen verbrake ende nyet en
hielde, soe waer ick als dan vervallen vanden beveel ende commenduerscap voirs., alsoe
verre mijn heer die balyer ende convent voirs. willen ende anders nyet.
Behoudeliken den balyer ende convent voirs. nochtans hoer verschenen ombetaelde res
pons te betalen, alle ende ygelick punt bijsonder als voirs., gelove ick brueder Goesen
voirs. vast, stade ende onverbrekelick tho halden sonder argelist.
52