Mèlleke dee hröótje meesta. Noe kojje voo 'n paer sént 'n maete mèllek kóópe, mè dan mosje
die wè ao. Elleke sént wier ommedraojd. Vandae wierder nie op un bitje mèllek van de heit
'ekeeke vö de kinders. Dae zit un ampart smaekje an, das wae, mè dae wén je an.
'n Heite kan wè es inkènneg weeze, dae binne kringen bie. Dae wiere óók keurengen auwe.
Kieke wie de móójste heite aode. Ze binne dan óók in die jaeren beezeg ewist om heiten te
kweeken zonder oorens. Stamboekbokken kwaeme d'r. Dae ei nog 'n tied ewist dajje hêên
bok mogt auwe zonder de vereiste papieren. Zó binne ze bepaelde rassen hae kweeke, dae
hae m'n nie vaarder op in.
In d'n oorlog waere d'r óók vee. 't Was un uutkomst bie de bonnen vó de mèllek. Je kon de
róóm d'r ofschèppe, dan aoje nog 'n klonter butter, pap d'r van kooke, in 't vèrreke was ter
óók nie vies van.
Nae d'n oorlog kwaeme d'r aol mè minder, de heiten wiere owedankt, de échte liefèbbers
bleeve oover.
Teehenwoordeg oor aolus verwènd. Ajje vroeher dost aode kojje nae de reehenbak, dae
stieng wè 'n aeker om te pitten, noe drienke ze d'r eihe suf in de liemonaode. Hêên wonder
datter zó vee binne die 't an der maehe ao. 't Beur nog datter op advies van 'n dokter
heitemèllek vooreschreeven ooit, in dae binne ménsen die atte der baete bie ao.
In de sèsteher jaeren is ter nog 'n verêênehienge ewist vó Duuveland. Dae zat weineg schot
in. In 1977 is ter 'n eilandeleke verêênehienge oppericht, die op 't óóhenblikhoed lóópt. De
heiten komme wee meer in trék. Dit is voornaemelek om kaeze te maeken.Vliejaere is ter op
Bru nog een heitekeuring auwe hliek mee 't mosselfêêst, volhens de krante 'n hróóte
trèkpleister. Je kon der óók kaeze proeve in dae wier vee hebruuk van emaekt.
Van 't jaer binne ze op Ouwerkèrreke ok wl mee un keuring behonne.
't Was 'n heitepraetje.
't hoeje, WULLEM
125