van d' olielampen omlaehe. Daenae schoof ze gurdientjes van de bestie, die an
de ziekant in 't kefee zat, ope. Arjaon was allêêneg overebleve. Ie wist, je kon
bie Dirkje as 't zo uut kwam, de klompe passé, 't Was z'n tuus'aeven wè nie, ma
afijn, je begriep m'n wè. Ze praetende saeme nog 'n stuitje over de mossels in dat
zö leuteg eweest was. In vo dat Arjaon d'r èrreg in ao, lagg'n neffen d'r in de
bestie.
'n Enkele keer brocht Arjaon z'n kammeraod Cortje mee, 'n opneukertje13 van 'n
vintje, "n sóórt Piggelmee ma wè helaoveg. Cortje, die nooit op 'n draogje zat,
dronk aok hraeg brandewien mit suker tot datt'n d'r van staraogde. In d'n donker
liepe ze dan saeme trug nae Burgh. Ma Cortje kreeg aoltied berouw in kèrremde
dan: '"k Za wè nooit in d'n emel komme, zö dikkels zö zat!" Sliengerend over d'n
Meeldiek, as 'n schip dat uut z'n roer elaope was, jeremiade Cortje: '"k Komme
nooit in d'n emel, oe mot dat noe?" "Man"- zei Arjaon -"Maek j'n eihe nie zö druk
of m'n noe wè of nie in d'n emel komme, laeate m'n noe êêst ma zie da m'n op
Burgh komme!"
'k Wou noe nog even vertèlle oe Jaonus, die Zurekzêêënaer, ier op 't Sluusje
trechte komme was. Zö a'k zei ao d'n 'n jaer of twaolleve in Afrika ezete.
Omdatt'r in Transvaal houd evonde was, wouë ze d'r aollemaele nae toe om van
dat blienkende spul te pakken te kriegen. 't Was dae in d'n tied van de Gróóte
Trek. Van Paul Krüger, Sarie Marijs in van die boere mit die ossewa, die tehen
d'Engelse moste vechte. Jaonus eit dae as houdzoeker aordig verdiend. Vlak vö 't
uutbreken van d'n Transvaalsen óörlog, konn'n nog mit z'n Krügerranden trug
nae Olland. Ie kocht ier de bakkerie mit 't kefee in 't wienkeltje. Je begriep noe
waerom de naem de' Nieuwe Wereld' okoze wier. Nae 'n stuitje iss'n mit de êêl
wat jongere Dirkje etrouwd. Ma d'r ou in Afrika toch wat opedae mit z'n
hezond'eid. Ie most 'n paer jaer laeter in 't Diaconesse Zieken'uus in Rotterdam
an z'n waeter opereerd óöre. Wan dat konne z'op Noorclhouwe nie. Z'n broer
Piet, die a jaeren in Rotterdam woonde, ao dat ereheld. Piet zèllef was êêlemaele
hek van ardfietse, ie oefende tuus op 'n sóórt fiets op pöóten. Tehenwóödeg
zouë ze homotrainer zégge. In 1904 mit d'Olympische Spelen in Londen ei t'n
waerachtig 'n zuivere medalje vö 't wielrennen aod. Over z'n operaosie rede
neerde Jaonus laeter tehen dokter Ferleman op durp: "Je weet da'k in Rotterdam
- ie wou heieerde tèrremen hebruke - an m'n thermostaat opereerd bin. Ma van
m'n broer Piet è'k noe, om op krachten te kommen, 'n fiets 0111 in uus 't oefenen
hekrehe, zö'n fiets op póóten. Die is mit beurtschipper Lennehent" mee ekomme
in die stae noe in 't heitekot!"
d'Aoller, aollerleste keer datt't ier in 't kefee dansen eweest is was in meië van
1918. Dat kwam zö; W.G Bóót wier dien dag burregemêêster van Burgh. Op d'n
Meeldiek bie Piet Noord'oek ao de Sluusenaers 'n erepóórte ebouwd. 't Was 'n
gróót fêêst mit 'n optocht in 't was aok nog prachtig weer. Vö de meziek vö d'n
dans wier de blinde Jaop Clement op 'n tendem uut Noordwelle aelt. Die speelde
dae op 't urregel in de kèrreke mö je wete. Clement speelde op z'n trekarmonica
in Kees van Strien op 'n tambourien. Ma Clement kende nie vee deuntjes, wè
hezangen uut de kèrreke. Vö de dansmeziek vö de polka eitt'n toen ma 'n
variaosie emaekt op de hezangen 28, 46 in nog 'n paer aore.
De stemmieng zatt'r hoed in! Arjaon danste zö vaste mit Dirkje, dat uren laeter de
bleinen van d'r curset nog op z'n buuk stiengeü! Ma toen d'r laeter op d'n aevend
'n krootje Seeskèrrekenaers binnekwaeme wier 't vechten. Veraol de Kloosters
dêêlde raeke klappen uut mit stikken zêê'ondevel! Ma de heitedurpers behonne
104