TERUGBLIK OP DE SCHOOLTIED VAN EEN OUD-LEERLIENGEANNO 1922
In 't ouwe stadje Thoole
dae stae nog altied onze schoole
ie is a ondert jaeren oud
dus m'n bin'dr mee vertrouwd.
M'n leerden in de klasse,m'n speelden op ut plein
noe bimmen ouwe mensen,tóen waere m'n nog klein.
Jan in Piet,in Kee in Soare
allemae netjes mit d'r erapjes over mekoare.
Ja,ik schreef ook nog op de leie
van 2x1= tweie
in mit een kriet op 't bord,
ma da's noe allemae vort.
'Ad je mit je breuken ma wat raek geflonst
dan most die leie schoon gesponst,
de bruune boone dieje in je spons 'ad gestoke
e'k jae...ren naederhand nog heroke!
Toen hiengen m'n schrieve mit de kroontjes-penne
dae most je wé even an wenne,
je moh nie kladde,je schrift most schoon bluuve
anders kreeg je ma een viere,oohuut een vuuve.
Soms most je viengertje we us omhoog
dan zei den meester droog:
"nie te lank wegbluuve ee"
in dan moh je nae de plee.
In of 't noe voó "een hrooten" was of voo "'n plasse"
die plee stong toen nog in de klasse!
In was ut vrie kwartier,dan speelden m'n op 't plein
al...Ie kinders,hroót in kleine
Mit Sliengere slangere,dan viel je as kind
dikkels op die arde grint,
je knieën deeën dan ieselike zeêr
mar allee,dafoele m'n noe nie meer.
De meesters(weete je't nog?) stonge dan op de blauwe zerke stoepe
De jongers oórde je spelende roepe:
"Keutelaere bok,oevee óórtjes steek 'k op" enz.
De meissen speelden in zongen van:"Anna stond te wachten,enz.
of "Herder,laat je schaapjes gaan" enz. Kss.kss,kss.
Ziezo,noe emmen mekoare weê us allemae hesproke in heziên
in bin'k bienae an 't einde van m'n riem.
Manoe wil'k toch nog even in alle deugd in eer
de hroeten doen an juffrouw Smi(t)s in meester d'(H)eêr,
die meester ei mien 't eên in 'toare bie hebrocht
in da bin'k nooit meê kwiet herocht.
Dus meester,wel bedankt bie deze
in ik kan nog altied leze!
In mensen lae m'n eerlik weze,m'n allemae wé us zinne
om nog us mit een schoóne leie te behinne
in noe haet de schoóle uut
'kzehhe "Saluut".
naschrift:
Helaas de P.Z.C.van 27 februari 1985 meldt onder de kop "Monumentaal
schoolpand in Tholen onder slopershamer" de sloop van het door Mevr.Blaas
zo gewaardeerde oude schoolgebouw.De onvermoeibare inzet van Huis en Heem
heeft niet mogen baten.Een fraaie karakteristieke gevel is voorgoed verlo
ren gegaan.Rest slechts de herinnering.
51