ruumte verkwikt..?
een dek en vier muren, ievallig is wind
die vriengt langst de ruten, een kouw'lijk begin
mae wat ei-je te willen, wees bliee da je 'r bin
as je in een klein 'uusje gebore bin
mae nauwe is wèrm en den an'ouwer wint
ze wete nie beter en wat wou noe een kind
buten liefst weze, want 't is binnen mae min
ook as j' in zo'n 'uusje gebore zelf bin
want ruumte verkwikt en is ulder nè 't zin
die uut de klein 'uusjes gekrope bin
- aerrem an aerrem de Gortstraet in" -
en ze krupe wè terug, mae tegen d'r zin
die in de klein 'uusjes gebore bin
eerda je 't weet een nieuw eirbeiersgezin
een dek en vier muren, een kouw'lijk begin
een kleinen d'r bie, alla, schik maer in
ze krupe 'r wè uut, want zo'n 'uus is mae min
en aol op je beurte aessem j' uut en weer in
beter een klein 'uusje toch, as glad gin
mae buten is 't beter en wacht 't gewin
die in de klein 'uusjes gebore bin
ze komme 'r vandaen, mae nooit mi d'r in
die uut de klein 'uusjes gekrope bin
ruumte verkwikt en zo èn ze d'r zin
die uut de klein 'uusjes gekrope bin
ze weune noe ruumer, mae wat is 't gewin
asje uut een klein 'uusje gekrope mae bin
in ulder gedachten nog leve ze 'r in
die uut de klein 'uusjes gekrope bin
ze kenne mekaore an een blik. an een zin
die uut de klein 'uusjes gekrope bin
j'ei mae te kikken, dan binde ze in
die uut de klein 'uusjes gekrope bin
ze dienke zogauw: 't is omdat ik 'et mae bin
want wat uut zo'n 'uusje komt da's mae min
en z'èn gin verweer en beruste d'r in
dat jen 'uus soms verandert mae nooit je begin
ja, ieval is érger, maer ei ruumte wè zin
ajje uut een klein 'uusje gekrope bin
Jan Zwemer
OPLOSSINGEN VOOR HET ARBEIDSVRAAGSTUK
51
