Op 'n mooie naezeumermiddeg
kwamme d'r twêê heren, ielk op 'n
moterfiets voor de deure de ankaop
oflevere.
De meissies stienge d'r mit stomheid
esloge nae te kiekene. Toe zei Mina
eindelik: "Is dat noe 'n stoomfiets? Wat
'n raor dienk is dat."
De twêê veinten begonne Flup 'n haop
technische zaeken te vertellene. Z'n
öören tuutende d'r van. Hie begreep t'r
niejt veel van.
Eên van de veinten steppende op de
motor in zei tegen Flup:
"Stap maar achterop, dan gaan we een rondje rijden en kun je gelijk leren hoe het moet."
Toe ze weig waere stienge de meissies te jammerene:
"Bel, bel, bel, wat mot dêêr noe van kommene. As 'n dêêr allêêne op weig mot, zal 'n nog dood an
z'n einde komme."
Toe ze wêêr vromme wazze, zei de man: "Weetje nu hoe het moet?"
Flup woe z'n eige niejt laete kenne in zei van wel.
De heren vertrokke in liejte Flup in de meissies an d'r lot over mit de nieuwe anwinst.
's Aeves, nae d'n eten zei Flup:
"Ziezoo, noe za 'k 'n 's göó perbeere.
Hie ree de motor nae buuten in onger veel raedgeviengen in waerschoewingen van de meissies
douwende 'n nae de Wesstraete.
Hie hao goewd onthouwe hoe 'n most starte, in jawel öör, even laeter ree 'n t'durp uut richting
Durpswegt.
"Mina, Mina, zei Krien'ie, wat hè m'n toch 'n knappen broer dat 'n zöö mar op 'n stoomfiets kan
rieje.
Twint waere d'r al 'n paer buren weze informere wat Flup noe hao.
Nae 'n hortie höörende ze in de vaorte 't geplof van de motor wêêr ankomme.
Even laeter ree Flup vrolik zwaoiend voorbie. Even laeter was d'r wêêr, mar wat wel raor was, dat
'n geregeld mar kleine rond'ies bleef rieje. 't Was duudelik dat 'r iejtewat niejt goewd gieng. 't Was
net of 'n niejt kon stoppe.
Toet 'n wêêr verbie kwam, riejp 'n: "Zet 't hek mar ope!"
Even laeter kwam 'n wêêr anrieje. Hie ree deur 't ope hek d'n hil op. Tenden d'n hil stieng 'n grööte
dichte hegge. Flup ree d'r regelrecht op an.
Even laeter waere zóówel Flup as de stoomfiets deur de hegge verdwene.
Nae 'n paer zwaere klappen viel de motor stille.
Hêêlemaele onger de schrammen kroop Flup tevoorschien. 't Eêrste wat 'n zei was:
"Die stomme lui hao gêênêêns ezeid hoe 'k 'n stille most zette.
't Eêrste commentaar van êên van de meissies was:
"Flup, joe leeft gelokkeg nog, mar dat duuvelse dienk mot weig."
Flup stieng d'r bloewend bie te knikkene:
"In wel zóó gaauw meugelek!"
In het Ouddorps bewerkt door Pau Heerschap.
50
