Bie de wienkel van Constant aelden ze de reclameborden op en veranderden "wasmiddel OMO" in
"circus OMO" en zetten de borden an de wegt.
Dien achenmirreg kwamme d'r vee huus nae de 'oeve van de van 't Westendejes. Want ze konne
dan wè nie naè circus Boltini, circus Omo mochte ze natuurlijk nie misse. An 't 'ekken stoeng Ko,
de bos'ouwer, bie wie a ze moste betaele. Zelfs Meriete Zudeweg, die a van niks wist en eigenlijk
gewoon bie Tine kwam spele, wier naè ruus estierd om 4 cent te aelen. Gelukkig ei ze dat edae,
want aers oa ze wè wat motte misse.
Toen a de klokke tweë sloeg, begon de voorstelling. Pier oa de 'oge zeie van voader opezet en riep
saemen mie Dies, die a mie z'n blauwe kop achter 't duvekot stoeng: "Hooggeëerd publiek.
Welkom bie circus Omo. Me voe julder Max, de slimmen ónd. Ko mie een spannende
poppen voorstelling, jongleurs, acrobaten en nog a vee meer. Vee plezier."
Pier lei mie vee bombarie een knoop in z'n ore en begon toen mie de truc die a 'n van Toon eleerd
oa. "Is d'r iemand in de zaal mie een stuüver op zak". Ube Riek oa dat natuurlijk wè, en Pier liet 't
publiek een lege papiere zak zië. Ie gooiden de stuüver stik 'oge in de lucht, en liet 'n mie een plof
in 't zaksje voale. Ie dee de zak goed toe, en liet Ube in de zak kieke. Ube, die a nog a gier was,
keek mè poepuülig, want de zak was leeg. Gelukkig zei Pier: "Wat zië ik daè noe Ube?"en ie pakten
de stuüver vanachter Ube z'n oren.'t Publiek von 't prachtig en Pier kreeg een groot applaus.
Pier maekten plekke voe Ko mie de poppenkast. Ko was op de leeftied da 'n graag stoer dee, dus
die oa een moordverhaal bedocht. 't vleesmes van voader, mie schoenlapperjam d'r an, was 't
moordwapen. Meriete en een deêl aere huus trokken mè witjes wig.
Gelukkig was toen 't clownsnummer an de burte. Dies 'oefden z'n blauwe kop nog mè vanachter 't
duvekot te steken, of iedereen stikten a wee van 't lachen. Mie een 'oog stemmetje riep 'n "Max",
en omda Dies eigenlijk een 'ele zwaere stemme oa, kreeg 'n daè ók de lachers mie op z'n and Mè
Max kwam oalmè nie, waedeur a bie sommigte de traenen over d'r kaeken liepe. Uüteindelijk kreeg
Dies 'm dan zovarre da 'n op 't podium sprong.
Dat was allenig nie voe lange, want a gauw kreeg Max de katte van de buren in de gaten, en goeng
'n d'r blaffend vandeur.
Gin gedresseerde beesten dus, mè 't acrobatennummer van Sjaak maekten vee goed. 't Was net as
in 't grote circus: toen a Sjaak z'n acrobatische act op z'n spannends was kloenk d'r geroffel.
Iedereen 'ieuw z'n aesem in. Zou 't Sjaak lukke om op 1 aerm te bluüve staen?
Mè jammergenoegt was 't gin geroffel van de trom, mè van de dunder. En a gauw begon 't te
waaien. De wind snokten an 't tentdoek en 't duurden nie lange of de laekens vloge van 't duvekot
en viele in de mispit. Dat was meteen 't einde van de voorstelling.
Toen a moeder zag wat a d'r mie d'r mooie laekens gebeurd was wier ze een bitje fuutig. Mè toen
a ze Dies mie z'n blauwe smoel zag, most ze toch ok wè lache. Die jongen zou a genoegt estraft
worre, want dat blauw zou d'r de kommende daegen nie óf gae. Toch most 'n saemen mie de aere
huus voe straf de laekens gae wasse.
Dat wier nog een 'eel circus, want d'r was vee waspoeier nodig om de laekens wee schone te
kriegen en voroal om de stank van de mispit doaken nie in bédde te 'aen. Dat wier dus mie recht
een circus Omo.
Gelukkig ze de laekens wee schone en fris ekrege want inmiddels was d'r concurrentie ekomme
van circus Persil, an de are kant van 't durp. Dat konne ze nie over d'r kant laette gae en dirrom ei
Circus OMO die zummer nog een paer keer opetreë mie ielken keer wee een aere voorstelling.
38
