Aflevering 161 herfst 2008
71
Ik kend'n een jong'n van m'n leeftied, ik za mao zeggen da tie Tienus eette,
un bitje apart'n, die gieng dikkels kaorten op un vremde plekke in un café
mee un stel and're vriegezell'n. Noe kwam dao ook altied een meis'n
kaort'n voo de gezelligheid. Da meis'n was nie getrouwd mao aa un kind.
Oe ze dur angekomm'n was wist geen mens. Da meis'n wild'n ze an de man
brieng'n wan die aa mao weinig te besteeën en ze wouen eur elp'n. Dao
zogt'n ze un oplossieng voo. Die was gouw gevonn'n. Dao wier
afgesprook'n da ze un kaortspil zouën speel'n mee as inzet da vrouwtje
mee eur kind en da Tienus most winn'n. Tienus wist natuurluk niks van die
afspraok. Ze kwaom'n saterdags of sondags, da weet ik nie soo hoet mjee,
wee bie mukkaore en ut spil wier gespeelt. Twas hoet afgesprook'n en
Tienus die won, da kon nie miss'n. Afspraok was afspraok dus ie trouwde
mee da vrouwtje. Ie kreeg vanselvers da kind dur gratis bie.
As leste nog un voorval van un stel die an ook onder zeil mosten, maa waa
ut niet hoed afliep. En daa konn'n ze zelf niks an doen. Da zat zo in
mukkaore, die man die bleek vliegende tering (TBC) te enne en die gieng
dood voo da ta kind geboor'n wier. Die vrouwe die zei: "Tis nog nie erg
genoeg da ze je kont vol steek'n, maa dan trapp'n ze ut nog af ook". Ze
stieng dur dus a direct alleen voo. Dur uutdrukkieng was nog a ruug, maa
ut was wè waa.
Zo speeld'n zig vroeg'r soms arugge tafereel'n af. En waa mos je nao toe as
tur iets fout liep. Je kon biena nie anders dan slikk'n zo as 't kwam, wan je
kon dur ook mee geen mens over praot'n. In sommige gevall'n aa zo'n
meisen geluk, dügene die at gedaon aa trouwd'n mee eur. Maa j'ader ook
zo ank ier boven schreef, die 't nie wild'n weet'n. En zogt da maa is uut in
dien tied.
Vroeger wier dur nie na gevrogen oe at vedder most, je kon trouw'n of
alleen bluven en zien da je tregte kwam. Ik las in un boekje uut 't einde van
de negentiende eeuw da elegare vol geschreev'n was mee
plantenmiddeltjes die toegepast konn'n woor'n om de zwangerschap af te
breek'n. Mao wien aa de kanse om da te leez'n en zeek'r nie om ut toe te
pass'n. Je most in dien tied tot 24 tellen of "voo 't zieng'n de kerrukke uut"
wan meer was tur nie. Al die hulpjes van tegenoorig die waoren dur nie. En
ut woord abortus da kend'n ze nog elegare nie.
En t'ei nog altied zo gewist da 't eel verleideluk is, un katte bie 't spek en
dur nie van meug'n eten. Daa kunn'n dur vee van mee praoten. Wa'k noe
amma geschreev'n en is egt waa gebeurt weeg'n.
J.L. Platteeuw, dialect Hoek
foto Rinus Willemsen
