Aflevering 164 zomer 2009
zêêe in brand, 's Ochens gieng ik stikken zoeke, die laege wè een kilometer
et land in. Ik vond ok een grööte vliegerkaerte, die was van ene Collins
ehweest, want die zen naem stieng der op. Mit de ramp bin ik ten kwiet
ehrocht. Jammer.
Laeter vloge ze ok overdag. Ik weet nog goed dat ter ene 's aevens om een
uur of zevene ene trug kwam in laege over de Oösterschelde vloog. Ie was
anehschote. Twêê Duitse jaegers viele an. Ie vloog zo dichte bie, dat je de
bemanning bienae zag zitte. Uut de staert kwaeme kleine rookwolkjes as de
jaegers anviele. Dat was de staertschutter. Ie schoot ze aolebeie ni benee.
Ze vloge weg, in stege zo oage mogelijk. Boven Noord Beveland bin ze
der uut ehspronge in bin de jaegers neerehstort. Of die bommewaarper
Engeland ehaelt eit, dat weet ik nie natuurlijk, 't Was een mooien aevend.
Ma 't was ok wel es anders. Op een ochend zat ik wi op den diek, in vö et
aevenoad van de Stad lag een duitse patroeljeböót. Twêê engelse jaegers
viele an, ma die schutter an boord schoot ze aolebeie ni benee. Den enen
viel bie Dreister in den anderen op Schoddebozze. Dat was nie mooi om te
zien.
Ik a ehzeid dat et leven der nie beter op wier. Der waere gin soldaoten
mi die es een praetje kwaeme maeke. Op een aevend kwaeme der drie
Armeniërs op 't aarf. Ze woue ni binne. Ze tevee ehdronke dienk ik.
Want ze praeten mit een dubbele tonge. Ik zie men vaoder nog mit zen
aarmen wied in 't deurgat stae. Ze kwaeme der nie in. Vö men vaoder ok
toen grööte bewondering. Ik dienke dat ten zen eige dood ehvochte as
dat nödig ehweest was. Toen ik ouwer wier begreep ik et. Twêê van men
zusters waere thuus.
In 1944 moste men evacuere, ma dat is een ander verhael.
Harry Boot, dialect van Zierikzee, juli 2008
Boulevard
In 'n witte vore
Trekt 'r 'n schip nae zeëe
Sterreschitt'rend in 't licht
Sterft 'n holf 'n zachte dööd in 't zand
Witblienkend staen d'uuzen uut te zien
Over zachtdeinend waetervlak
't Zwarte asfaltlint
Slienger z'n eihe van De Ruyter
Totan 't Woold'uus
Wie at dit hoed bezie:t
Laet aolle Spaanse costa's vaere
Jaap L. Murre, dialect Tholen
