m
44 m
Aflevering 174 winter 2011
udder gank gaon. Alleen de veugels die iewen me goed in de gaoten, wan die
fraoten nogal is op wa mü zelf wild'n en.
Ik ielp ook mee om de vroege errepuls uut te doen. Dao stiengen soms
bostebeiers tussen en die waoren eel vergiftig zeiën ze. Douwkool'n kon je
dur ook tegen komm'n, mao ik gloof nie da tie vergiftig waoren. Noe stieng
der nog wè andere vuulte, zjeekebedden bievoorbeeld, mao die staok'n mü
uut, ze waoren goed voo de knienen, die aoten ze hern.
Kwolen wieren verschillende soort'n gezaaid en laoter uutgeplant. De witte
en de savooije kwolen wieren a ze groot genoeg waoren, fien gesneeën en in
un grote keulse pot gedaon mee zout dur op. Daorop lei opoe dan un doekje
en un kallesieje. Zie was altied eel proper, mao dao waor'n ook minsen die
't nie zo nouwe naomen en dan rook je nao un paor maond'n de kwolen a
an de deure, ik kan nie zegg'n oen aokeligge rotstank da was. J'aa dur ook
die vee te vee zout op de kwolen deeën en dan kreeg je gjeen zuurkwole ma
zoute kwole. 't Zelfde deeën ze ook mee boon'n. In de winter konn'n ze dao
van eten. Un ienkelieng stirrilizeerde wè a boon'n, maa un diepvrieskasse
kend'n ze in dien tiet nie om boon'n en kwolen in te bewaar'n.
Spiennaajze zaaid'n ze ook, die lust'n uk nie gern, maa 'k most ze wè eten.
In dun blommenof stiengen vee verschillende soorten blommen, un
biezonder soort was toch wè de naakte juffrouws in 't najaor.
In dien tiet, 't was oorlog, zaoiden vee minsen ook tubbak. Dun tubbak die
a je kon kwopen op de bonn'n was niet goed. Fleur de goskant noemden mü
die.
A tubbak riepe was mos je de blaoren op mekaore leggen om te
fermenteer'n. Sommigen deed'n dao nog een of ander sausje over om de
tubbak beet'r te laoten brannen. Dan gieng je nao iemand toe die a un
sniejmesientje gemaokt ao en liet ze snieën. Da kostte je un djeel van je
tubbak, wan da mogt je nie in geld betaolen. Voo da geld kon je toch ost niks
koop'n in den oorlog. Alleen a je vee geld aa, dan kon je tregte in de zwart'n
andel.
Noe most ik voo z'n moeder, mien opoe dus, ook wè is un boodschap
doen. Dan most uk om stropie of sjelei mee un kannetje. Da was in de
krujenierswienkels los te kwoop. Mee un grote polleper schept'n ze da
in je kannetje of potje wa je zelf mee most brieng'n. Ik kreeg dan voo de
moeite un cent om jodelak of un
kaneelbrokke te koop'n.
Dien oom iew ook bieën. Ei ao ze in
kassen, mao ook in kurven. Die leste
smerden die mee koeiestront in om
goed af te sluiten voo de vogt. Da
von'k un ieseluk vies werkje. Soms
gieng die een kasse kort in de buurte
op een land mee koolzaod zetten.
Da dee die mee de kruuwagen en
uk mogt dan mee. Die stieng dao
dan ienkele daogen en zo konn'n
de bieën stuufmeel verzamelen om
laoter eunienk van te maoken. Da
was dan kwoolzaadeunienk, ma je
ao d'ook klaovereunienk en andere.
Ut bieënkot in dun of van mun opoe.
