In un slienger, die je mee d'ant most draoien wier dun eunienk dur uut
gesliengerd en in potjes gedaon. De bieën zelf wieren eigeluk verneukt wan
die kregen in de winter suuk'r. En die suuk'r was goedkoper mao blauw
gemaokt omda de minsen ze zelf nie zouën opeten. Op die suuk'r zat geen
accijns en op de suuk'r die mü zelf aten wè. Van de raten maokten ze
boenwas.
Tuus aden mü geen of. Mü kregen soms appels en groente van opoe. Appels
wieren dan in stikjes gesneeën en an un touwtje gereeg'n. Dan brogt moeder
ze nao den bakker en die droogden ze boven den oven. Dan kon je ze eel
lank bewaoren.
Ut kwam wè voo da opoe en oom Jan, a mü klao waor'n mee werrukken,
errepuls mee sla, spekjes en azien giengen eten. Dan mogt ik meeëten wan
ze wist'n da'k da lekk'r von. Omda ze mao un klein tafeltje aden, zat ik op de
stove om mun prakje op t'eten.
Ik vulde mun buuk goed en dan gieng ik, un alve kluit rieker, naor uus.
Jan Platteeuw, dialect Hoek
Binnen onderd jaor
Je bént dao van eigen nii eiken dag mee begaon,
mao soms kan een méns der wè bii stillestaon,
zou de wèreld binnen onderd jaor nog bestaon
en oe zouwen de ménsen der dan mee omgaon?
Of waoren we zukke ontiigelijke grööte egoïsten
én én we gedaon net of dan we 't echt nii wisten.
Bén we döödgewoon roofbouw bluven plegen
en kon de wèreld daor uuteindelijk dan nii tegen.
Mao we bluven optimist en gaon uut van 't idee
dat de volgende generaotie 't gewoon beter dee.
Dat de wèreld dus nog altiid gewoon bestaot,
ondanks alles wat er noe deur ons fout gaot.
Zouen de ménsen nog altiid in de file staon,
of èt den auto dan al lang en brêêd afgedaon?
Et iederéén een vliegertje voo de deure staon
waor a je dan mee om booschappen kun gaon?
Het aantal ménsen wat ad er ier dan za leven
is nog altiid ongeveer een miljard of zeven.
Wan de Chinezen èn udder a goed geléérd,
méér dan één kind dat is vaneigen verkëêrd.
Van astronautenvoedsel gaon z' alles weten,
wan vléés zullen ze dan nii méér kunnen eten.
Je ziet oek géén netten méé te dróógen angen
wan der wor dan géén visje méér gevangen.
Het aantal béésten is ondertussen g'alveerd,
wan dao wor vaneigen niks méér geregelêêrd.
Vee klachten gao je'r trouwens nii over öören
wan 't natuurlijk proces mag je nóóit verstoren.
De leste boeren bèn dan in Polen gaon wérken;
de grond is 't domein van wolf èn wild vèrken
Onderd jaor is dan de gemiddelde leeftiid,
Aflevering 174 winter 2011
