m
56 m
De weete.
Aflevering 176 zomer 2012
Pietje was een slim vintje. Ie kenden de buurtjes van 't durp op 'n prikje.
Ie liep z'n ronde dan zöö, da tie de mêêste kans ao op een borreltje ier en
dao. A tie d'r ergens ééntje aangebooien wier, zei tie vöö 't mooi: "NTeë, 'k
moe nog een êêle ronde doen, ee". Mao vöö a 't flesse wéé opgeborgen wier
zei tie vlug: "Alli, ééntje dan. Staondebêêns." En dan kipten die z'n neutje
achterover en ieuw z'n glaosje nog es bie. 't Kon gebeuren, dat ie aan 't
einde van z'n ronde nie zo vast méé ter bêên was.
Ook z'n prevelement was dan nie méé zöö zuuver
'k Kommen zeggen dao Wannes den Beer dööd is",
zie tie dan, in plekke van: "namens de familie doe ik
u de weete van het overlijden van de heer Johannes
Adrianus van de Velde."
Op 'n kêêr most tie aon 't ende van een ronde die
nog a spiritueel verlööpen was nog nao dad uusje
van Wullem en Sanne de Kraker, Téma aon 't ende
van de Binnendiek. Ie zag t'r wè een bitje tegenop,
mao 't most toch gebeuren, ee. Acht kleine jongers
aoden ze dao, bie de Kraker. Vöö de deure van de
kêête stongen, méé tie van vaoder en moeder d'r
bie tien paor klompen.
Pietje liep, zöo hoed en zöö kwaod a 't gieng d'n diek af, nao de deure van
de kêête en stuukten, kop over klööten over de verzaomelieng klompen mee
deur en al nao binnen.
'd Eêle familie zat aon de slao méé spekjes en ze verschrokken natuurlik
vrêed van da binnenstukende ventje. Pietje kwam moeizaom overènde, keek
méé z'n deu d'n alcohol vertroebelde verkesöögjes in de rondte en zei: "Noe
zeg ik niet wien a ter dööd is ook." Ie draoiden z'n eigen om, schopten wa
klompen opzieë en strompelden d'n diek wéé op. De familie de Kraker zat
stokstief aon taofel. Even laoter lachten ze mêê z'n tienen zöö ard da Pietje
die ao a een flink ende op weg was 't toch nog kon öören. "Wien doe ta noe,"
zei tie. "Lachen ao 't er iemand dööd is". Vrouw de Kraker ei dien zelfde
aoven nog de blinden op een stuuk gezet, wan ze wist natuurlijk a lange dat
Wannes den Beer dööd was.
Jan Lauret