Aflevering 177 herfst 2012
49
Buurman Merien.
Buurman Merien kó je zo
regelmaetig méé z'n ouwe
fiets an 'd and de dunen
over zie gae. Mee lêêg
waeter kó je goed over 't
arde zand fietse. Merien
z'n "gebied" liep tot de
kleine düüntjes, a bienae
onder Aemstie. Varder
gieng un nie, dat was wee
van een andere. Aoles
wat un op z'n fiets mee
kon brienge zeulde 'n ie
mee naer flus. Ie zetten de
planken steil overaande
om te laete drógen. Wat
un nie direct mee kon
brienge, brochten wa
oager in de dunen, méé un merkteken van un paer gekruuste planken. De
andere jutters bleve daer of, "t was un soort eerecode onder mekoare.
M'n Vaoder a un keer van strandplanken un tuunbank getummerd.
Buurman Merien kwam us kieke. Ie gieng méé z'n duumstok in deweere
in begon ök van die banken te tummeren. Ie dee wa us un karweitje bie te
zomer'uzen,in dae raekte ie die banken ók wé kwiet. Van z'n ééste vondsten
aode 'n un net schuurtje gebouwd mee un werkbank d'r in in een bitje
geréédschap. Ie bouwden nog meer schuurtje bie z'n uüsje, ma nae maete
d'n ouwer wier, wiere die schuurtjes steeds kleiner.
Merien ao géén radio, un krante las t'n nie, ik vroeg dan wé us an z'n oe t'n
dat wist wanneer d'r sturm kwam. Och jongen zeitte 'n dan, je mö ma goed
nae de locht kieke, in ök kieke wa de veugels doeë. Je mot ók goed nae
de zeeë luustere.as de zeeë schelt dat betekend dat dat d'r vaarre weg un
sturm gewist ei, meesta komt die dan ók deze kant op.
Z'n weersvorspelling klopten vrie aordig.Tegen dat d'r sturm kwam zag
j'n overdag nie, ie gieng dan avast voorslaepe. 's Nachts oörde je dan z'n
klompen over de wegt klosse op weg nae strao.
Toen ik in 1954 van m'n verdiende held un fototoestel kon köpe was één
van de eeste foto's die van buurman Merien, zittend op z'n ouwe stoel vó
z'n uusje in z'n schuurtjes.
Mee de vooruutgang most ók het uusje in de schuurtjes weg,buurman
Merien kreeg un uusje in de buurte.ma 't mooie was der off.
De jutters bin uutgestorve, ut éét noe strandopschonen,want de gemêênte
vind aoles wat dur anspoelt ma rommel da zo gauw mogeljk opgeruumd
mot oore, anders kriege ze geen blauwe vlagge.
Teun Rosmolen