m
44 m
£0
Enen 'n kerstboom
'aolen.
Aflevering 182 winter 2013
VERHALEN EN GEDICHTEN
Even 'n kerstboom 'aolen
Die staot er 'n 'êêle maond: m'n kerstboom. Daogs nao Sinterklaois zet 'k die
altied op en mee Drie Koniengen, gaot ie weer nao de vlierieng terug.
"Daor ei je nog's plezier van joengen," zei 'k tegen m'n eigen toen toen 'k
't pakket van de smalle trap nao beeneejen liet slieren. Da was zondag 'n
weeke geleejen. "Voo die 30,00. kan je toch gêên èrmoei liejen?" Die zit
nog in z'n ouwe verpakkieng van 'n jaor of vuuve geleejen. 'Andig 'öór. Toen
'k 'm in de kaomer aod uutgeleid, docht 'k: "Noe kan je beter die takken
uutvouwen op d' achterstraote, want anders ei je toch nog last van die
naolden in 'uus." 't Bin we kunstnaolden, mao toch. Verzichtig brocht ik de
bööm nao buuten en boog alle takken in de goeje stand. Toen viel 't m'n
op dat 'r ook lichtgroene en doenker groene takjes en blaodjes waoren. En
éérlijk gezeid, de vorige jaoren most dat altied mao roefel de schoefel gaon,
mao noe lekker in 't zonnetje begon 'k d'r nog plezier in te kriegen ook. 'k
Draoiende 'm rond en bekeek m'n boompje, dat best gezien mocht worden.
Binst an'k zö bezig was, goeng de geraogedeure van de buren open en
'borende 'k de buurvrouwe over de wegt roepen: "Hie bin ook best op tiid
mee je kerstboom." 'k Riepen nog dan 'k d'r lange plezier van wou 'èn en dat
ie best gezien mocht worren. Even laoter reejen de buurtjes verbie en ze
zwaoiende nog 's lacherig, zö van: "Da's nog 's de moeite, die boom van joe".
'k Bezjoerende natuurlijk vriendelijk terug. In m'n eigen docht 'k: "En noe is
tie nog nii angeklêêd.
Ongewilligekeurig moen 'k terugdienden an 'n verhaol van Gertie Evenhuis
die vroeger bie ons op 't durp, in de pasterie, weunende. Zö'n vuuftig jaor
geleejen. Om den één of andere reejen zou t'r da jaor gêên kerstboom in de
kérke kommmen. En da was tegen 't zêêre bêên van Erik en Anke. Alle twii
brugklassers misschiens, dan is 't op. Die goengen toen op kersstaovund
mee d'n bus van Biervliet nao Bresjes en kochten op de Middelburgse Markt
nog êên van de leste kerstböömen. En dan terug mee dien bööm, de bööt op
en de bus in. Vee bekieks onderwegt, allicht. En complemènten. Zö van: Da's
'n schööne bööm. Dao kan je mee voo den dag kommen. Maor in Bresjes
was dat eventjes anders. De chauffeur wou dien bööm nii in z'n bus. Nao
vee gesoebat, goeng dan toch eindelijk d'achterdeure open mocht de bööm
mee. Néé, nii liggend mao staond. Êên van de luuken in 't dek wier open
gezet en zo vertrokken Erik en Anke mee udder bööm nao Biervliet. Op
Kerstaovend en 't vriezende 'n bitje. Toen d'r controle kwam, zei dien kérel
dat 't tegen alle voorschriften was en zeker mee zö'n open luuk. 'n Ouw
mannetje wou nog zeggen, dat ie eigenlijk toch wel op d'n tocht zat en dat 't
zö koud was, mao net op tiid beet ie op z'n toenge. 'n Extra kaortje kopen?
"Allicht nii," zei Erik resoluut tegen de conducteur, "voor 'n koffer kööp je
toch ook gêên kaortje?" En Anke ketste d'r nog achter: "Begaoge is begoage,
néé waor?" 't Mannetje da net op z'n toenge gebeten ao, gebaorende nog:
"En dat gaot allemao mao deu!" toen de conducteur 'n teiken gaf an de
chauffeur zö van: Karren Maor.
En ielk jaor an 'k de kerstboom an 't anklêêjen bin, kom me da verhaol in
m'n bolle, 'n Gewaorschuwd méns telt ommerst voo twêêje. Nao Middelburg
om 'n kerstboom? Nêêje, dat nööit nii méér. 't Is an d'achterdeure, zeg. Dan
mao nao de vlierienk.
Rinus Willemsen, dialect Land van Cadzand
(verscheen eerder in de PZC van 19 december 2009)
f—