Aflevering 182 winter 2013
47
Piet gae nae binne in maekt Merie wakker. Die behriep netuurlijk ok trek oe
aarg of 't is.
Jao, dit zaekje mot eêst, de wienkel in de karre motte noe even wachte.
As Piet op de fiets stapt in nae 't uus van Leendert gaet kriegt 'n toch 'n
idee. As de keurmeester mee wil waarke, dan zou d'r nog wat moöis kunne
gebeure. Want Leendert eit
't net as bienae aole Renissenaers nie zö aarg op de Duitse soldaoten
behrepe. Net as vee aore Renissenaers eit'n in 't bos van 't slot boamen
motte kappe. Die de moffen noödig om op 't strangd versperriengen an
te laahen. Want ze dienke dat de invasie van de Engelse in Amerikaanse
soldaoten misschien wè ier za weze. Laehe dunen, vlak land d'r achter,
't zou best 's ier kunne weze. In zodoende is t'r van 't bos nie vee ml
overhebleve, de stammen stae aolemaele diepe in 't zand op 't strangd
nae de zeê te wiezen. Neênt, ok de keurmeester is nie pro-Duits. Ma vö 't
plannetje wat of ze noe in ulder oód is t'r nog eêne noödig. Dat is Wullum,
die vö de vaarkes van de Duitse soldaoten mot zurhe. Daer mot Leendert
dust eêst 's mee praete. Piet krieg wT 'n bitje moed. Ie bluuf nog a lank mit
Leendert praete in ie gaet bienae vrolijk trug naer uus. D'r is gelokkig nog
gin maans nae de wienkel gekomme, dust eit 'r ok nog gin eêne evrohe waer
of Piet toch is. In zö'n klein durp wete de maansen toch a gauw genocht
vees te vee van mekaore. Piet is 'n praeter, ma vandaehe kan 'n eêl goed
zwiehe.
D'n aoren ochen eêl vroeg 'oört Piet 'n bitje leven achter z'n uus. Ma ie bluuf
gewoon laahe in ie doe net of dat 'n niks 'oört. Nae 'n aolf ure durft 'n te gae
kieken. Ie oor du geknor in geboenk behroet. 't Is 'n wonder maansen, d'r
loap 'n groöt vet vaarke in 't kot. De keu van Piet is wT eêmae gezond in mit
z'n natte neuze komt 'n net boven 't out uut.
't Is wT eêmae d'ouwe Piet die of bie z'n klanten komt. D'r is t'r nog wè eêne,
die zeit dat 'n gister zö stille was. Ie wiest op z'n mond in zeit: tandpiene.
Ma gelokkig is 't over.
As Heinz uut Dortmund bie de vaarkes komt om te kieken of Wullum z'n
waark goed edaen eit, eit 'n eêst niks in de gaten. Ma aneêns ziet 'n toch dat
'r in 't kot 'n doöd vaarke leit. Noe jao, doöd is doöd, Heinz maek z'n eihe
d'r nie zö druk om. Somtieds zit 't mee in somtieds zit 't tehen, De aore
"schweinen" bin aomè eêl gezond, dust de commandant za nie zaahe dat
Heinz nie goed d'r vö gezurgd eit. Misschien eit 't beëst 'n ziekte. In aalk
geval za de keurmeêster van Renisse d'r bie motte komme. In as t'r 'n ziekte
ondekt oort, mot 'n 't vaarke ofkeure.
De keurmeêster kiek ma somber nae 't onderzoek. Ie laet 't vaarke
ofvoere om vernietigd t'oren. Dae kiek gin maans naer omme dust dat
't uuteindelienge toch op de borden van de Renissenaers komt bluuf
onbekend.
Op diensdag gae Piet in Merie eêl blie nae de rippetisie van 't kaarkkoor
waer of ze aolebeie in zienge. In 't was agheêl nie moelijk om de lof van d'n
Eer te ziengen!
Henk Blom (Schouws dialect)