Franse tantes
Ze kwaeme aoltied in de naezummer mie de regelmaete van trek-
veugels, de Franse tantes. Ze gienge nie nae 't zuden net as de
zwelmen, maer andersom, nae 't noorden toe. Ze weunden ergens
in Noord-Frankriek in de buurte van Beauvais en ze namme ielk
jaer in september de sneltrein nae Roosendaal. Dae namme ze de
trein nae Goes en daevandaen gieng 't mie een taxi nae de
Bosselse polder.
Ieder jaer wee opnieuw zag ulder neef Sjaak, al van kinds-af-an
uut nae de logeerpartij van z'n Franse tantes. Z'n moeder was een
zuster van ze en om reden da zie de geliefde zuster was en ze
bovendien nog in 't 'uus van d'r ouwers weunden, bleve ze bie
'uer aoltied een paer weken logeren.
A Sjaak an die logeerpartij van z'n tantes most dienke, wie n aol
tied en bitje opgewonden. Dan waaiden d'r iets van dien groten,
vremden wèreld deur 't 'uus. Dan was n een bitje in de warre van
de Franse parfum die uut d'r burgerse kléren wolkten en van de
kussen die a t'n kreeg van d'r roöie geverfde luppen. Dan zeie ze
'êle lieve Franse woorden tegen 'm en drukten ze ulder petit cou
sin tegen d'r lief dat wèrm en zochte anvoelden.
Van z'n moeder ao n dat nooit zö 'evoeld, want die droeg een
Zeeuws kostuum en d'r doek en beuk zatte vol mie spellen waer a
t'n z'n eigen lilijk zeêr an kon doee. Die tantes ao ok van die
prachtig klienkende naemen. Ze leke wè van glas waer a je mie je
vienger tegen an tikten. Catharine en Antoinette. Mae z'n moeder
ao 'ezeid da ze vroeger gewoon Kao en Teune 'eêtten.
Moe Kao was a jaeren 'elee mie d'r veint nae Frankriek geëmi
greerd. Dae waere ze een boerebedrief begonne en toen d'r veint
'esturve was, ao ze den 'êlen Sanderse boel verkocht en was ze nae
de stad Beauvais veruusd. D'r ongetrouwde zuster Teune was
over'ekomme uut Zeeland en saemen waere ze een modezaakje
begonnen en van toen of an 'eêtten ze Catharine en Antoinette.
Catharine ao eên dochtertje die Mimi 'eêtten. Toen die nog klei
ne was, gieng ze mee nae Zeêland op verkantie, mae laeter toen ze
nae schoole gieng, bleef ze in Beauvais bie vrienden achter. Sjaak
kon z'n eigen een klein blond misje voe de geêst 'aele, waer a t'n
mie speelden op een grind'oöp an den diek.
Sjaak z'n moeder bleef aoltied Kao en Teune zegge tegen d'r zus
ters. Ze kon die deftige Franse klanken nie deur d'r kele kriegenn,
ze waere nie anepast an d'r tonge en d'r tanden. Ze liet die Franse
naemen nie toe in d'r mond en ze 'ieuw d'r luppen stieve op
mekaore. 't Bleef voe 'eur Kao en Teune, Zeêuwse misjes die vroe
ger op d'r klompen nae schoole gienge en toen ze grotter waere
den 'êlen zummer mee gienge nae 't land, peeën wiee en juun
optrokke, stuken zette en petaoten raepe tot ze d'r een waeter-
kniee van kregen.
Sjaak most netjes tante Catharine en tante Antoinette zeggen.
Tante Antoinette liet 'm de klanken net zölank herhalen tot n de
Franse uutspraeke te pakken ao. En Sjaak dee lankzaem letterg-
reêpe nae lettergreêpe in z'n mond of a t'n mie kleine slokjes van
Franse wien proefden. Voraol bie de naem Catharine was 't een
'êel kunststikje om de klanken op de juuste plekke in je mond te
kriegen. 'Open, die mond, varre en wied open en die letter r ach
ter in je kele leggen', ze lei d'r viengers op Sjaak z'n strot en zei:
"Ier mö je 't voele, dae mot 't trillen'.
Sjaak ao z'n eigen een bitje beschaemd 'evoeld: ie was zukke inti
miteiten nie gewend. Ie begon gauw een r te raspen achter in z'n
kele om d'r viengers kwiet te raeken. Ok kon n nie goed tegen die
Franse parfum. Dae raekten ie van in de warre. Ie was benauwd
m e r i