moeder zei aoltied tegen z'n: 'Je mö nie rusten voeda je 't 'oógste bereikt eit'. Misschien ao tante Catherine d'r ok zö over 'edocht voe Mimi en ao ze Mimi mee nae Zeeland 'enomen omda ze den 'oogsten bloei bereikt ao. Ze was zö mooi da Sjaak z'n ogen nie kon gelö- ve. Ie ao wè's 'eleze over mèhsen die op slag verliefd wiere, as 'etroffen deur den bliksem. Dat gebeurden bie 'um. 't Leek wè of t'r van binnen iets 'ebroke was, iets 'eêl 'ards van glas dat in gru- zels 'evaolle was. Ie kon gin boek langer as een minuute vastouwe, en z'n 'êle leven dat n 'eleid ao tot noe toe, leeken 'm graeuw en ééntonig. 'Eêl de pedagogische academie zag n an voe een groten bak mie ofvaol in de stank waevan a t'n aol die jaeren 'eleefd ao. Noe was t'r echte Franse parfum in z'n leven 'ekommen en ie liep t'r van in de wolken. Zö iets liefs, zö mooi en levenslustig was n nog nooit tegenekomme. Ie droomden d'r van da de wèreld eên groot paradies was waer a zie mie z'n tweeën in liepe. Sjaak zag z'n eigen voe 't eest 's goed in de spiegel en ie zag dat n d'r zelf ök wè wezen mocht mie z'n kop vol krullen en z'n diepe brune ogen. En a t'n 't zelf nie ontdekt ao, ao Mimi 't wè tegen z'n 'ezeid, want den twidden dag van de verkantie gienge ze a fietsen saemen deur de Zak van Zuud-Beveland en lagge ze an den zeêdiek op gossprieten te kauwen en de boten nae te kieken die nae Antwerpen of 't zeegat in vaerden. En den derden dag zwomme ze a in een kreeke op 't schorre en lagge ze nessen mekaore bruun te bakken in de lamsoren en de zeêkrael. 'Da kan toch nie; das m'n nichtje; das fermielje. Ik kan toch nie verliefd worre op m'n nichtje', docht n bie z'n eigen. Mae 't kwam wè vee voor in Zeeland, neven die a mie nichten trouw den. Ie 'oorden de pastoor op de preektstoel voorlezen: die en die bin in ondertrouw 'met dispensatie in de derde graad'. Dat mocht alleêne mie speciale permissie. 'En waerom', ao Sjaak 'evroge. 'Omda trouwe in de fermielje slecht is voe de guus', ao z'n moe der 'ezeid. 'Kiek mae nae dien boer van 't Laege Weggetje. Die is mie z'n nichte 'etrouwd. Ie eit er achte en d'r is t'r nie eên die a ze aol op een rijtje eit.' En of Mimi dae wè 's an 'edocht zou Ie geloofden van nie, want den vuufden dag leêrden ze 'm a 'oe a t'n op z'n Frans most kussen. Dienzelfden aevend gienge ze dansen op de Boulevard in Vlissingen. Zie 'ieng mie d'r aermen om z'n 'aols en ze fluuster- den in z'n oren: 'je t'aime'.

Tijdschriftenbank Zeeland

Noe. 'n bitje uut 't zuudwesten | 1998 | | pagina 12