Carnavalsaovond. Aerrenburg is 'the place to be'. Mao nie voo de West-Zeêuws-Vlaomse hardcore-scene. De ruten van café Jumi in Oóstburg zien beslogen. Binnen is't zweten as een paerd. De zanger op't kleine podium brult de longen uut z'n lief. Ie kom amperan boven de muur van gitaorgeweld uut. Voo't podium wordt 'r gesnokt en gedouwd. Wie benauwd is voo butsen en buien doet 'n paor stappen achteruut. Mao da's geên mens, vanzèlf.D'r rollen d'r een paor over de vloere. De basgitarist duukt in d'n ambras. 'n Berg lachende gezichten. 'Keêr fun, man.' Noe numme Ballerina Pimps, 'Keêr fun, man'.

Tijdschriftenbank Zeeland

Noe. 'n bitje uut 't zuudwesten | 1998 | | pagina 31