Juni
Ik 'ouwe 'k-ik nog vele van joe, ge kun-gie m'n 'erte bekoom;
Al 'ouwe 'k-ik nog meêr van meie, die lieve maond,
Al was je-gie nooit liek as zie, bie riemers uutverkoorn,
Al is de zeumerglans van joe 'aost uutgetaond;
A bleuzn je kaokn nie as roózn,
'k 'Ouwen vele van joe m'n junimaond.
En weet je wat at dat is? -'t Is da kaleur van liën,
Dat op je kaokn ligt, da van je lippen zucht.
't Is net as of bie joe de mooie zeumerbiën
Ons komn verteln: de zeumer die vlucht.
De mensn meugn beginn te dienkn
Da stilletjes an de daogn slienkn
Nog een maond of tweêe, dan valn de blaorn af
En ménig lieve maot en meisje zienkn in 't graf!
