Zakken
Bamboes Ko
- Ik zag je broer nog an z'n auto bezig vanochend...
- Da kan weze, jae.
- Daè stoeng t'r daerom eên bie, die ao z'n 'anden diepe in z'n
zakken. Dat moe je ook wille 'oor, om daè zö bie te staen...
- 'Oe bedoel je
- Ae noe, as een ander wérkt, en dan mee j'n 'anden in je zakken
stae
- Weet jie wè 'oe koud as 't was vanochend
- Nie goed neê. Ik zat in m'n auto.
- O, was jie dat toch Ik docht 't a.
- Stoeng jie daè dan bie Dan 'k daerom niks gezeid, oor
- Dat ei je wè, stommen ezel. Za ik 's zeie waèrom a 'k mee m'n
'anden in m'n zakken stoeng Ik docht: ik moe waerme 'anden
'ouwe, want zömit vraeg m'n broer of ik even iets kan 'elpe vast
te 'ouwen...
- Kérel, was jie dat! A'k dat geweten ao, dan was ik er even bie
komme stae!
- Huhuh, zeker mee uh, j'n 'anden in je zakken, zeker ee
In m'n element
An d'oever van de Oósterschèlde
an die mooie Schouwse kust
mit 't waeter an m'n voeten
dae kom 'k pas goed tot rust
As de wind over 't waeter
an kom raez' in volle kracht
en m'n bienae van den diek blaest
dan bin 'k 'êmae in z'n macht
Dan geniet 'k van de golven
mit d'r brusend dreigement
dan voel 'k me Zeeuw in élke vezel
en bin 'k in m'n element
Maartje Stuut
