Wildplasse
j= Ik magge 's zummers graeg 'n endje gae
E fietse, een bitje deur de Zak en zö. En a 't
dan waerm is, dan gae 'k ergest an een
diekje zitte, drienke een blikje, doe een
plas tegen een boom, en gae wee deu.
En dat mag noe nie ml. Ja, dat blikje nog
cl net, zelfs at er bier in zit, maè die plas
nie. Dat is wildplasse, en daè ka je een
gróte boete voe kriege. Dat betéken voe
mien da 'k in een dichtbieziend durpje
mo gae zoeke naë een café. Daè gae ik
dan binnen, bestelle voe m'n fesoen wat
te drienken, gebruuke 't toilet, en gae wee
deu. Dan bin 'k een endje an 't fietsen en
dan mo 'k wee. In 't volgende durp zoek
ik dan wee een café en herhaalt de oefe-
nieng z'n eigen. Soms raek je ok nog 's an
de praet, en drienk je d'r nog tweê meer
as a je van plan was, dus je snapt da zö'n
ontspanne tochtje a gauw een probleem-
tocht wor, zeker a je bedienkt da nie elk
durpje een café eit. Daè kom nog 's bie da
de mensen ok nog gae praete. 'Ik zagge
Dieleman nog uut 't café in Driewegen
komme' zei t'r eên. 'Ik den in 't café in
's 'Eêrenoek zie zitte' zei t'n aren. En den
derden merkt op dat n mien diezelfde
middag ok a bie 'Oetjeskerke an d' aeven
in 't café zag. En a drienk ik dan maè
gewoon limenade, 't is nie echt goed voe
m'n reputatie.
Noe 'k daè 's over gedocht. Zou 't nie
meugelijk weze dat de gemeente Bossele
'ier en daer een paer officiële
Wildplasplekken anleit. Ik dienke dan zelf
an een gróte betonne bak, mie muren van
een meter dik, die a de grond in gaet.
Daè ka je een flienken boom in plante, en
wat bosjes d'r rond voe 't zicht. Paeltje d'r
bie om je fiets tegen te zetten. Eens in de
tweê jaer kan dien bak dan uutgegraeve
worre, en onder politiebewaekieng (en
een delegatie van Greenpeace) vervoerd
worre naè de Covra. 's Winters kan de
grond uut dien betonne bak dan gezuverd
worre. De zwaere metalen d'r uut en zö.
Dan kan 't spul wee de grond in, ergest in
de Zak.
Om zö'n Wildplasplekke te markeren
dienk ik an een mooi bord, in de vurm
van een afbeeldieng van een Grenslinde
saemen mie 't symbool van Manneke Pis.
Dan zit er nog wè wat subsidie van
Brussel an vast ok. En a je dan toch bezig
bin, dan kan d'r messchien ok wè een
Wildplasroute uutgezet worre. Dat zou
toch uniek weze in de wereld. Ik zie dat
in gedachten a op alle tv-zenders, van
Nederland 2 tot CNN (live):
'Commissaris van de Koningin van
Zeeland neemt op passende wijze eerste
Wildplasplaats in gebruik'. En op
Omroep Zeêland de gebrukelijke variant:
'Kinderen van de basisschool uit
Ellewoutsdijk brengen een bezoek aan de
eerste Wildplasplaats'.
Maè 't za wee wè stute op bezwaeren. Van
feministen bievobbeld. Dan komme d'r
horretjes: 'Honden in de goot, mensen in
't café'.
'k E voe m'n eigen toch maè een t-shirt
laete maeke: 'Wildplasse mö meuge'.