Bosseltje
In Domburg bestaet 't meziekkorps
Apollo 'onderd jaer. En dat 'ebbe ze heftig
gevierd mee een a lang van tevoren uut-
verkochte aevend in 't gemeênschapsuus.
Wat nog taemelijk biezonder was an dien
aevond en 'eêl leep, was dat de Dom-
burgse Gaoischieeters ook optraede. Vö 't
eest. Ze zoenge ouwerwesse en dat was
een groot succes. Ik kreege er traenen van
in m'n ogen en ik was den ênigsten nie.
't Is is nie toevallig dat ménsen van een
durp juust noe mee 'onderden komme
om zöies mee te vieren, 't Is de tied.
Overaol zie je vroeger veromme komme.
De nostalgie regeert. De regio is een
trend. 'Eemkundige verênigiengen bloeie
as een Oóskappels duunroósje op kunst-
mis, ons dialect oort officieel erkend
(Hoera, me bestae!) en overaol in de
wienkels leie Zeêuwse streekproducten.
Of 't noe te vreten of te zupen is of nie:
at er mae Zeeuws op staet is 't goed en
oor 't verkocht. En 't kriegt a 't nie oppast
nog een berg subsidie ook.
Dat 'oef nie verkeerd te wezen. Wat meer
aandacht vó 't lokale en 't regionale is in
dit land mee z'n Randstad-parlement nie
verkeerd. Een positief gevolg van deze
regio-renaissance is dat onze cultuurdrae-
gers, de schrievers (a me die nie zövee)
en de musici, de cabaretiers en de toneêl-
spelers (die me gelukkig een bitje meer)
gestimuleerd ore omdat ze een gróter
publiek en meer feedback kriege. Dus
mee een bitje geluk ore me streks meer
van Iengel Reinhoudt, van n8werk en
'opelijk ook van mien gróte liefde, Anja
Kopmels, de Joni Mitchell van Kurtjee
(waè bluuft die nieuwe CD?).
Dat de nostalgie naè de Zeêuwse cultuur
weer opbloeeit is in wezen goed. Alleen is
't mee chauvinisme net as mee keuken
zout. Je moet er mee oppasse. A je d'r
tevee van neemt, gae je dood. Je moet 't
dosere en mee maete neme. Zö ook mee
de liefde voor 't heem. Weest er gerust
verliefd op, dat verdient 't, mae bluuft
aoltied in de gaten 'ouwe da me in een
gróter land en in Europa leve en daè
gewoon mee moete doee in de saemenle-
vienge. An plaetsnaemborden mee tweê
taelen ei gin méns wat.
Mae Zeeland boppe. En wat dan opvaolt
in 'eêl die oplevienge van aol dat regionale
is dat onze regionale media, de PZC en
Omroep Zeêland, 'opeloós achterbluve bie
wat de ménsen interesseert vandaeg de
dag. Goed, z' ebbe een rubriek over
Zeêuwse diengen en streektaele, en een
muziekprogramma, dus ze kun zeie dat ze
d'r wat an doee, mae 't is meer een aflaet
as een serieuze pogienge om de Zeêuwse
cultuurrenaissance journalistiek te vertaele
naè de ménsen toe.
Eigenlijk is 't een schande 'oe weinig de
krante, de radio en voraol de tv (bie de tv
verstaen de meêste journalisten zélfs gin
woord Zeêuws) an Zeêuws doee. Daè zou
dus nog wé 's een 'ard bosseltje deur
kunne.
nummer 10
