Gedraoi
Jan Zwemer
Misschien èn je d'r ook a van g'ore: de erkennienge van 't Zeeuws as
streektaele volgens 't Europees Handvest van Streektalen en Talen van
Minderheden, oor bedreigd. Deur een stel Zeêuwen die at er nie vö
voele omdat ze zelf geên Zeêuws praote? Belneênt. Deur een
pietepeuterig-precieze ambtenaer die as 't Zeêuws gewoge eit en te
licht bevonde? Ook a nie. 't Zeêuws is patent in orde gebleke. Neê,
deur de Nederlandse Taalunie. Een organisatie die opkomt vö 't
belang van 't Nederlands - mae dus nie vö 't belang van dialecten.
I noe nummer 13
Ongeveer een jaer terug stierde de Nederlandse Taalunie een brieve op
naè de Provincie Zeêland mee de motivatie van ulder 'neê'.
Op die brieve ik - ook zowat een jaer gelee - as lid van de Commissie
vö Dialectbevorderieng mien commentaar gegee. In een soort notaatje
(in 't Nederlands) bestemd vö de provincieambtenaeren die d'r eige mee
de erkennienge van 't Zeêuws bezig 'ouwe. Op 21 november flee jaer
'k dat an ulder gegee. Dat commentaar van mien is tweê bladzies verder
ook afgedrukt.
Mae 'k wou d'r nog 's even dieper op ingae. Op dien brief.
Want wat as de Nederlandse Taalunie 'ier feitelijk laet mèrke, da's noe
net 't zelfde as die raore gedachtekroenkel die ajje bie zövee ménsen
'oort as 't gaet om de erkennienge van 't Zeêuws. Ik bedoele 't
misverstand dat dat een claim zou weze dat 't Zeêuws een taele is.
Daè gaet 't glad nie om. 't Gaet erom dat 't Zeêuws erkend 'oort as
strééktael. Nog preciezer gezeid: 't Zeêuws vaalt in de tèrmen van 't
Europees Handvest van Streektalen en Talen van Minderheden. Da bin
tweê verschillende diengen: streektaelen en taelen van minder'eden.
In dien brief van de Taalunie oor dat onderscheid glad nie gemaekt.
't Zeêuws is inderdaad geên taele van een minder'eid zöas 't Bretons en
't Catalaans. Maer een streektaele is 't wè en wat 't belangriekste is: 't
bewies daèvan 'oor geleverd as de definities van dat Handvest op 't
Zeêuws toegepast 'oore. Dan slaen aolle klokjes en metertjes uut: de
Zeêuwse streektaele voldoe gewoon an de criteria.
