'Die gaen pas wèrke as ze gae roke'
Jan Zwemer
'Ik zou d'r nie graog op zitte. Aol die toeren onder je reet. As da ploft,
dan vliegt 't overaol.' Jakob Dekker eit 't nog nie gezeid, of de stemme
uut de luudspreker verzekert 't publiek dat de veiligheid beslist
gegarandeerd is. De organisatie van de 'Trekker-trek' op Aegtekèrke
eit er aolles an gedae - ongelukken kunn' agauw nie gebeure.
As de brullende monsters uut de zwaerste categorieën buten de witte
strepen van de baene komme, dan 'oort de motor stilgeleid en stopt 't
geweld. Beter gezeid: dan 'oore de motoren stilgeleid. As de finale van
de zwaerste klasse begint, scheurt er een trekker mee vuuf Chevrolet V-8
motoren in de richtienge van de finish. Vliegtuug- en tank-motoren bin
bie deze vuuftonners 'eêl gewoon. 'Kinderen op de dijk moeten daar
weg' klienkt 't dan uut de luudsprekers. De diek van aerde achter de
finish, een meter of drie 'ooge, is bedoeld om trekkers tegen te 'ouwen
die at misschien deurschiete. Gelukkig - of misschien jammer, want een
bitje sensatie is nooit weg - 'oeft n nie in actie te kommen vanaevend.
't Is 19 juli en 't is noe de elfde keer dat er op Aegte een trekker-trek
g'ouwen 'oort. Van de weie op 't 'oekje van de wegt naer Oöstkappel
bin de vazzen afgestoke vor een baene en zeker tweêduzend boeren en
butenlui staen d'r langst de drangekkens. Aegtekèrke is compleet
anwezig, van over 'eêl Walcher bin d'r boerezeuns en joenge boeren.
Maer ook ouwere ménsen uut de landbouw, motorenfreaks, sleutelaers,
PK-fanaten, fans van de deelnemers en gewoon gasten die at op de
gezelligheid afkomme. Kiek, daè staen joenge meiden mee lange rokken
- de 'Westoek' van Aegte is t'r ook. 'Gezellig meênt Oóstkappelaer
Jakob Dekker. 'Een bitje boerevolk.' En een ander weet te vertelle da je
op een trekker-trek ménsen ziet die a je bie andere gelegend'eden nooit
za tegenkomme. Uut de Westoek, uut de Lepelstraete en zo. Terwiele at
de luudspreker meldt dat 'Roadrunner' 't vèrste van aol is gekomme in
de zwaerste klasse, doet Jakob uut mekaore wat er zó antrekkelijk is an
noe nummer 13 I