Waoters
Piet de Blaeij
Tusn Darlinghurst Street en Elisabeth Bay Road in Sidney ligt een parkje
mee daorin den fontein van El Alamein. Wat een fontein is, weetn
wudder wè, dienkn me, maor El Alamein is messchiens wat onbekender,
wan geschiedenisonderwies gaot noe niet altied over vroeger.
I noe nummer 14/15
Awel, El Alamein is een plekke in Egypte, zö'n 'onderd kilometer ten
westn van Alexandrië. lertn 'èn de g'allieêrde troepn onder Montgomery
de Duitse legers onder Rommel tot staon gebracht, lertn begon den
Duitsn nederlaog in Noörd-Afrika. Bie die g'allieêrde legers zaotn oek
Austraolische troepn, vandao dien El Alameinfontein in Sydney. Die
fontein sproeit dag en nacht en ziet er uut as de volmaoktn pluzebolle
van een paereblomme.
Het waoter oördt an 't einde van tientalln fien vertakte waoterleidieng-
buusjes zö fien verneveld, da je eigenlijk alleên dien prachtig gevurmde
bolle ziet. Een schitternd symbool: je ziet een onop'ouwelijkn mènsen-
stroöm verneveln in den tied. Je kan t'r niet over'eene kiekn: de bolle 'èt
een deujsnee van zeker vuuf meter. Je kan d'r oek nie deur'eene kiekn:
zonne en kunstlicht geevn de bolle overdag en 's nachts een zulvern
kleur mee goue vonkn.
Judder begruupn da wudder van zoiets schoons een foto wouwn maokn.
Me zouwn om de beurte voo 't in waoter gevangn edelmetaol poseêrn
en de camera bedienn. Me zouwn 't schrievn in licht: 'I was here.' En
eênmaol afgedrukt op fotograofisch papier zou daor 't onomstotelijke
bewies zien.
Dan staot daor ineês een aboriginal voo ons. Die wiest op den fontein en
zegt: 'Gao t'r mao saomn voo staon, dan maok ik een foto van judder
tweêën. Saomn op de foto is vee schoner.'
Wudder kiekn is nao mekaore. Ze ziet mien aorzeling, leest in mien oögn