Atlantis in Zeêland
Vorige weeke las ik over een gehucht Pan'uuzn. Da zou èrges onder den
Ouwn Zeêdiek bie de Kiekuut geleegn 'èn. Geên méns die a 't wist,
toeda iemand me nao vee rondvraogn beldn en zei: da Panuuzn, da
bestieng uut tweê 'uuzn en een schuure, d'r woondn een mèlkboer, en
da was 't wè zo'n bitje. En 't bestao nie meê.
En inderdaod, 'k ben wistn kiekn en 't bestao nie meê. Geên restje
fundêrieng meê te zien, zelfs geên plasse waoter, op de plekke waor a
Panuuzn de grond ingezakt is.
A je zö 's een keertje op een ouwe landkaorte kiekt, dan zie je dat er in
Zeêland vee van zukke plekjes vanbuutn of vanbinn verdweenn bin.
Opgeofferd aan de vooruutgank, verlaotn vanwege 't gebrek an gerief.
Geruumd vanwege een nieuwe buurte of een nieuwe wég of voo een
kluute groen in 't Landschapspark Zeêland. 't 'Èd aomao zö z'n goeie
reedn dochtn me toen, of dienkn me noe. Mao 't is ondertusn aomao
bie mekaore wè vee.
En 'oe klein a die plekjes oek waorn, d'r woondn wè vee mensn, dikkels
in gróte gezinn.
En 'eêl da land is wèggezoenkn in den tied.
En dan ineês, dan is 't weê zoverre. Dan wil ineês iemand weetn waor a
de Rietmusse lag, of 't Villaopark bie Sluuskille, of de Panuuzn, of den
Eêndracht, of wien weet welk van de 'onderdn andere buurtschapjes en
gehuchtjes, of straotn, of wèggetjes: 'Pao, wao laogn de Stille Vuuf
I noe nummer 14/15
Menuutn, en wao was 't Donkerstraotje of 't Zwarte Padje? En liep 't
Spuipadje echt nao Oöst-Sluuskille? Mao wao lag Oöst-Sluuskille dan?
'Èn ze echt een diek geleid over den Eêndracht, en is de waotertoorn van
Terneuzn echt in de grond gezakt? Oöwn, vandaor al da waoter in dien
put, opao.'
En leg da dan maor 's uut. Dat er lang geleejn een gróte beschaovieng
was, 'eêl verre weg en toch 'eêl dichtbie joe. 't Was een beschaovieng
die a gróót was, omda de meêste mènsn dao toen deêl van uutmaoktn,
een beschaovieng van kleine gróte mènsn. Die a woondn in een
beschaovieng die a verdweenn is in de golvn van den tied. En die a
alleên nog bestaot in de aopmao minder vertélde ver'aoln over 'oe a de
mènsn toen leefdn en waovan a ze dróomdn.
Wa zeg je noe? Is dad a tien jaor geleejn, da me daor om aerpels
giengn? En a vuventwintig jaor, dat da gos aon de Binndiek zö lékker
vree?
Is 't echt zö dat de werklijkheid in een auto riedt, en de verbeêldieng op
de fiets gaot, of te voete achteran komt? Doe wèl, en zie nie om, wan:
't Zeeuws Atlantis bluuft verdwienn in de golven van den tied.
Laot 't zonnetje mao schienn, en de groeten van Piet