'Oögmoedswaenzin
'Oe dat zö?'
Maartje Stuut
'n Stuitje geleeje wier 'k opgebeld deu den tennisser uut Kamperland
waer a 'k de vorige keer over vertelde dat n docht da m'n een stopera an
't bouwe waere in Zierikzeê. Ie was benieuwd oe 't gieng.
'Oe is mee julder gemeênte'uus afgelöpe', vroeg n, 'is 't a klaer?'
'Ja', zeg ik, 'en ik bin d'r a in wiste kieke ok. Al 'k dae eêl wat vo motte
overwinne'.
'Nou ja, dat lillijke gedrocht is ons teslotte ma deu de strotte gedouwd,
ee? Een éénvoudig gebouw ao 'k prima gevonde, dat weet je. 't Is ten
slotte ma een werkplekke vor ambtenaeren.'
'Ma je bin wè wiste kieke?'
'Ja, 'k von da 'k er nie over mocht oórdêle a 'k er nie gewist was. Dus
mit de open dag bin 'k mee looie bénen nae binne gegae.'
'En?'
'Noe bin 'k nog bozer, want m'n bezoek ei m'n mêning allênig ma ver
sterkt. Wat een 'oógmoedswaenzin of dae ten toon gespreid oort, dat
ouw je nie vo mogelijk. De dierte straelt er vanaf, 't Za architectonisch
wè verantwoord weze, ma d'r zit een 'oóp lóze ruumte in, nie normaal.
En van buute is 't nog aoltied spuuglillijk. Zö'n blikke bunker neffen zö'n
mooi monumentestadje. Om dae 45 miljoen gulden an uut te geve, is
eêuwig zonde van 't geld. Wat zeg ik? 't Is godgeklaegd!'
'Bie julder ze toch een chronisch geldgebrek?'
'Breek m'n bek nie open; overa mot op beknibbeld ore. Geld uutgeeve
vo een theater vinde ze nie rendabel. Asof dit rendabel is! Ik aoltied
no* nummer 14/15
geleerd da je je geld nuttig most besteeë. Ma 'ier is de verhouding tussen
't kosteplaetje en 't nut eêmae zoek'.
'Bel, bel, is 't zö erg?'
'Ik bin benauwd van wè! Noe ao 'k die ambtenaeren best een mooi
gemeênt'uus gegund as de burgers niks te kort kwaeme. Want volges
mien bin de ambtenaeren d'r om d'r vo te zurgen dat vo de burger aolles
goed geregeld oort.'
'Dat zou ik oök dienke.'
'As ze noe bevobbeld vor ons in de bres gespronge waere toen ons
zieken'uus nog goed functioneerde en in Den 'Aeg in aolle toónaerden
't belang van een goed zieken'uus vo de bevolkieng van Schouwe-
Duveland (plus de horde toeristen 's zomers) onderstreept aodde. En as
ze d'r eige dae nie zöma as een stelletje sukkels weg adde laete stiere. En
as ze d'r eige 'ard emaekt aodde om 't ouwe theater Mondragon in orde
te kriegen; of desnoods in 't nieuwe gemeênt'uus een bitje ruumte afge-
staen aodde vo een klein theater (dus gin extra ruumte mar in plekke
van). Of as ze bevobbeld de Grote Kerke daevo geschikt 'emaekt adde,
die noe deu eên man opgeeist wor vo een 'andjevol mensen die dae wille
zienge.'
'Wat bin dat eigelijk vo mensen bie julder gemeênte?'
'Ze doe gewoon d'r eige zin en luustere nie nae de burgers. Ze doee niks
vo de jeugd en niks vo de ouwere. M'n ier gineêns een gezellig uut-
gaensleven. Deu die stomme horecastop is t'r ok gin behoorlijke
concurrentie, dus gin mens doe z'n best om 't gezellig te maeken'.