De biebel in rt Zeeuws
Jan de Jonge
'Vorig jaer bin d'r een stel ménsen begonne mie 't vertaelen van den
biebel in 't Zeêuws. 't Is aol begonne mie de Zeêuwse oecumenische
diensten in 't Kerkje van Ellesdiek. Daè wazze teksten in 't Zeêuws voe
nódig. In de winter van 2000/2001 is t'r een oproep edae om ménsen te
vinden die a an dat vertaelen mee wouwe werke. Uut 'eêl de provincie
bin daè reacties op ekomme en op 't ogenblik bestaèt de vertaelgroep
uut zowat twintig ménsen.
Nae een stuitje woue me toch meêr as zömae net wat pericopen vertaele
en is t'r beslote om een 'eêl biebelboek an te pakken. In overleg mie 't
Nederlands Bijbelgenootschap (NBG) is toen beslote om an 't Evangelie
volgens Marcus te begunnen. Eêst me eprobeerd om toe eên Zeêuwse
vertaelieng te kommen. Net as vee ménsen voor óns kwamme me a
gauw toe de conclusie da de regionale verschillen in vee gevallen toch te
gróót wazze. Toen is beslote om de vertaelgroep in regio's op te dêlen:
Zuud-Beveland, Walchere en Noord- Zeêland (Schouwen-Duveland,
Noord-Beveland en Tholen). In Zeêuws-Vlaanderen is t'r nog gin groep.
Ménsen die a belangstellieng om an 't project mee te gae doen kunne
d'r eigen aoltied nog anmelde, wan 't zou toch leuk weze da daè ok iets
van de grond kwam.
Toen at er éénmaal beslote was om mie verschillende groepjes deur te
gaen, aa 't weinig zin om mie z'n aollen an 't zelfde biebelboek te bluve
werken. De verschillen wazze wé te groot om toe eên vertaelieng te
kommen, mae toch nie zó gróót da me mekares teksten nie konne leze.
Op dit ogenblik is 't zó da Zuud-Beveland deur egaen is mie Marcus,
Walchere doe 't boek Jona en Noord-Zeêland ei voe Ruth ekoze.
Zó zachjes an bin me noe zövarre da me wat teksten die a me onder
de andacht van wat meêr ménsen wille brienge as net diegene die a
direct bie 't vertaelwerk betrokke bin. As voorbeeld is in deze Noe hoofd
stuk tweê van 't Evangelie volgens Marcus of'edrukt.
Voe óns as vertaelers zou 't leuk weze a d'r wat ménsen bin, die a deze
en andere teksten 's wille leze en dan te zeggen 'oe a 't op ze overkomt.
noa nummer 14/15 I
