Jantje
Albert Goeman (Yesse)
Jantje was mae kleine van stik, maer ie was nergens benauwd voe. 't Was
anders een zachtmoedige man - ie was tegen aalle geweld. 'Waèrom aal
dat geweld? Net as op tv ok, da's nergens voe nódig, de kinders dienken
op een duur at 't zö 'oort' zei ie aaltied.
Mae deur z'n collega's op de werkplekke wier ie uut'elachen: 'Jie bin een
schietebroek man, jie durf niks'.
Dan beet Jantje op z'n luppen, want ie kendn z'n eigen. Ie herinnerdn
z'n eigen nog goed 'oe at n vroeger op schoole epest wier, speciaal deur
eên joen. Ie aa z'n eigen aaltied inehouwen toet at n op een keer z'n
eigen nie mi kon 'ouwen. Ie was in een onbeheerste drift d'r op evlogen,
aad n tegen de grond esmakt en z'n gezicht toet moes eslogen. De
meêster zag t't en sleurdn n d'r of. Ie kreeg behoorlijk straf van de meês
ter, want die pesterij aa die nie geziee. Jantje kooktn van kwaèd'eid.
Maer eên geluk: de pesterijen wazzen opehouwen.
Buten z'n werk dee Jantje vee an jeugdwerk en dat wier wè ewaardeerd.
Laeter kreeg n d'r een koninklijke onderscheidige voe en kreeg n bezoek
van een journalist. Toen at die an Jantje vroog 'oe at die over de politiek
docht en zeide dat politiek toch aal ouwoeren was, zeide n terug: 'Zölank
an ze ouwoeren wordt er nie eschoten en laèt die politici mae lekker eten
en drienken van onze centen, want dat is aaltied nog goeköper as an ze
mie granaten en raketten gaèn gooien.'
Ja, zö docht Jantje d'r over. Mie praten mos je de problemen oplossen.
Praten en nog 's praten - op een duur zou t'r daèmee toch wè iets goeds
uut de busse komme.
Mie een man of vuve werktn Jantje op een werkplekke en de verhouding
noe nummer 16 I