Een verhaal van vö de leste herverkavelieng
Jan Zwemer (Walcher)
'Ebbe je dat wè 's g'ore, van dien toerist die as
mee z'n camper in een dam stoeng - uutgere-
kend as t'r op da stik land gecombined moch
ore? Ae noe, luustert dan mae.
De man zat net an z'n spinaoie mee een vaer-
kenslapje as n dien combine zag komme. Ie
stapte uut z'n camper: 'Moet u hier zijn?'
Dien van dien combine knikte van jae.
'Ik zit net aan de spinazie, eet u mee?' Ie
docht: dan kan 'k in elk geval zelf klaer ete.
'Da's goed', zeide dien anderen. En ie zette z'n
combine in den dam an de aore kant van 't
wegje. Dien camper in, 't stof van z'n overall
gesloge, en ie goeng zitte.
'Ik had toch spinazie over', dee dien toerist. 'En
dat lapje doen we in tweeën'.
'Zöas je wil.' En 'Ube van Jaop - want dien was
't - keek 't raempje uut nae dien blok tèrve daè
at de camper vö stoeng.
Kérel, wat kon zö een plattelander ete. Dien
toerist zat er mee gróte ogen nae te kieken.
Klusje aerrepels, een paer flienke scheppen
spinao - 't goeng mee de staende waegen nae
binnen. En 't 'alve vaerkenslapje da goeng in
eên keer 'Ube z'n waegen'uus in.
Dien anderen keek asof n waeter zag brande.
'Zo', zeide n, 'U hebt geen moeite met dat
lapje.'
'Neê zeide 'Ube mee z'n mond vol - en ie
keek wi uut 't raempje. 'Van zukke doen 'k er
meêstal vuuftiene op een dag. As je 's ochtends
goed op tied begint, dan gae dat goed.'
'Vijftien', dee de toerist. 'Meent u dat nou?'
'Vuuftiene', knikte 'Ube en ie stoeng op.
'Bedankt ee. Goeie spinao, meneer. Enne, wil u
dat blikke 'uus'ouwen even an de kant zette,
da'k er langst kan mee m'n dosmachien?'
Een paer minuten laeter zat 'Ube op z'n combi
ne op 't lapje tèrve en ree dien anderen in z'n
camper 't wegje uut. 'Vijftien', mompelde de
man. 'Vijftien, ongelofelijk.' Vödat n bie den
draoi in 't wegje uut 'Ube z'n zicht zou ver-
dwiene, tuuterde de toerist nog een keer. In z'n
spiegel zag n óe at de man op de combine z'n
'and opstak.
't Klopte - 't was goeie spinao geweest. O nee,
spinazie natuurlijk.
I noe nummer 16