Bamboes Ko
- Hoei, 'oe is 't?
- Aa, nie érger ee.
- 'Ouwe zö dan. Moe je een biertje?
- Nou neê. Over tien minuten misschien, 'k Doen d'r de leste tied eêntje
in een 'alf uure, vanwege de pries. Eên sestig vor een glasje, da vinde 'k
noga an de maete, wat jie?
- 't Is waer, je kan beter thuus een flesje open trekke, mae da's ook nie
gezellig.
Piet ei-je vo mien een tapje? Neê, alleêne vo mien. Ko staet op tekst, zeit
n net.
- Zeg, wat 'ore 'k noe, eitje dochter ander wérk?
- Uuh, neê 'oor. Ander wérk feitelijk nie. Ze is alleên van Der Boede naè
Ter Reede verkast, naè Vlissienge dus. Mae ze doe nog 't zelfde. Op een
afdêlienge mee van die ouwentjes die a een bitje an 't suffen bin.
- Jaja, juust. Dan zit ze in dat nieuwe deêl zeker, bie Ter Reede? Da's dan
wè een voruutgang zeker?
- Nou, da's mae net 'oe a je 't bekiekt. Ze is noe glad in d'r eêntje bie zes
van die ménsen, mae ze leve noe vee zelfstandiger as vroeger in Der
Boede...
- Dat was ook een verschrikkieng ook, op zó een zaal vol ménsen. Die
'aodde nooit rust...
- Jae, mae dit systeem da's ook wat 'oor. A je d'r alleêne vo staet, dan
moet er nie te vee mis gae, want een ander ka je nie zómae inschakele.
Van de zeumer 'én ze brand g'aod in de keuken bie eên zö'n afdêlieng.
Goeng die verzurgster van d'r stokje, want die was daè bezig in die keu
ken. Nou - toen 'aodde die beweuners dat gelukkig in de gaten en die
bin toen zö 'ard gae gille, dat er op den duur hulp kwam.
- Dat za dan nog wè 's fout gae.
- 'k Vreêze 't ook jae. Moe jie impersant je biertje noe a?
Piet, geef Ko d'r eên van mien. Enne, doe mien gliek d'r ook maer eên.
En een nieuw viltje asjeblieft, dat mag wè vo die pries.
no* nummer 17 I
