't Liekmaèl
Cees Chamuleau (Ovezande)
Een gebeurtenisse die z'n eigen ofspeelt ergens tussen
Ovezande en Kwedamme omstreeks 1920, verteld deur Persaèn
Chamuleau en opgetêkend deur z'n zeune Cees Chamuleau.
Op een 'oefje an de Viezoekdiek weun' Arjaèn Outepinne en z'n vrou
we. De mensen zeie aoltied Arjaèn uut 'd 'utte, omma z'n boeltje d'r zö
'aèveloös bie stieng. Z'n vrouwe was Leune Bonman - Leune Tetoore
zögezeid. Arjaèn was nog varre fermielje van mien want die most moe
Jaone zegge tegen mien grottemoeder, en Janna van grotmoeder - de
vrouwe van Matthies Mallekote van de Slekkepad - was een zwaèger
van z'n.
Arjaèn en Leune boezeneerden zömae tegaère want de 'erten en boönen
wazze geên van beien angesloge, dus guus aa ze nie, en errebeiers op
de 'oeve, da kon nie lije. 't Was dan ok mae een erremetierig bestaèn op
dat spulletje an de Viezoekdiek en ze druupten dan ok aollebei van de
graèten.
Je kon wè begriepe da ze aollebei blieë wazze da Puut-op-'n-stoppel - de
boer van Boenke - noe eindelijk esturve was: vuuf-en-negentig jaer was
die veint eworre. 't Was nog een jonge kaerel za 'k mae zegge en geên
maes die d'r over kon schreêuwe dat n uut de tied was. Ie 'ad noga wat
losse stuvers naegelaete en Arjaèn - die nog een staèk was - most te
lieke komme. Daèr 'ad n moed op, en de andere liekgangers dochten d'r
ok zö over.
't Liekmael was bie Moses in 't Olietunnetje, 'want dat wuuf van Moses
kon zö goed koke,' zei Meleêne van 'tèndn de Dreeve aoltied, en dat
kwam uut ok. De begraèfenisse was gauw gedaè deur de dominie van
'Oedjeskerke en ze zate dan ok a gauw in 't Olietunnetje te schranzen:
eerst krege ze jikkemienen mie dermen, omma Moses pas geslacht aa -
eên van vuufonderd noga liefst en dat midden in de zummer! De maène-
schieters vloge achter de slachter an toen at n 't verke uut mekare snee.
Mer affijn, Arjaèn en Leune vonde 't lekker. Kort daènnaè krege ze een
'olve pint per man en daè was Arjaèn ok nie vies van. "t Is beter dan
wellewaèter' zei n aoltied en anders kwam n nooit in d'onkaaie voe
zoiets, dus noe zou n d'r gebruuk van maèke ok.
's Achemirregs krege ze nog stropievetstuten mie gornaèt en ze tastten
wee flienk toe. Ie 'ad 'r zö twelve achter z'n lillekerd. "k Weet nie waèr
of n ze steekt,' zei Leune die zelf zat te polkögen voe d'r tweêden.
Voorda ze wig gienge, krege ze nog beschuut mie poskop en redies en
de vrouwelienen bostebeiers op brandewien. Je kan wè begriepe da die
oppenduur zö zot wiere as een juun: d'r beênen begonne ok a aarig te
doen.
Wullempje Gist wou op een gegeven monement de varrekieker van
Moses gebruke, omma n docht dat d'r een vliege in z'n glas evloge was.
I noe nummer 18