't Landsbelang
Jan Zwemer (Oöskappel)
Ze kon d'r nie naè kieke. 't Was een kwaelijken droom - alleen
noe was n echt. 'Neemt ze mee', fluusterde ze tegen de vrouwe
mee de schaere. D'r kele was droge. 'Die... Dien... Wat a je
afgeknipt eit. Pak maer een vuulniszak uut de keuken.'
De vrouwe knikte, leide de schaere neer en keek even naè 't gezicht van
de man die bie 'eur in d'r schoot lag. Ie sliep - diepe en vast.
Schoefachtig keke de tweê vrouwen mekaore even an. Zou zie 't ook zö
zonde vinde? Van dat 'aer?
Mee korte stapjes driste de andere naè de keuken. D'r goeng een kast-
deure open en w] dicht - toen een anderen.
Delila keek naè dat 'oöd, naè de lippen, de neuze, de rimpels naest de
mond. Dat lachje van z'n as n vertelde over z'n missies en 'oe at n iede-
reên wi bie den bok gedaen ao...
De vrouwe kwam terug mee een vuulniszak. Schielijk griste ze de
striengen 'aer van daè as ze gevaalle waere. Tweê laege rechts van z'n
'oöd, drie lienks, eên op z'n bost - den zevenden was zeker op de vloer
terechten gekomme.
Afschuwelijk. Even wou ze nog vraege of ze mee 'eur 'and deur die
'aeren kon gae - een leste keer. Maè neê. De kolonel wachtte op 'eur
bericht. Nog een keer controleerde ze of 't briefje d'r lag, in 't schuufje
van 't kastje naest 't bed.
De vrouwe fluusterde wat. 'Ik gaen.' Ze keek nog 's naè de man op
Delila's bed. Wied open stoenge d'r ogen, d'r kaeken 'aodde tweê rooie
plekken, een tand beet op de onderste lippe. "Ier.' Delila pakte de
schaere van 't kastje.
'O ja.' De schaere verdween in een binnenzak van de vrouwe. Mooi jasje
trouwens. Waè zou ze dat vandaen...?
'Succes, ee.'
Delila knikte. D'r mond was noe zö droge as 's ochtends bie 't wakker
oren. Nae een aevend mee tweê of drie flessen wien, tenminste.
't Briefje.
De kolonel.
En as ze 't noe 's nie dee? De telefoon kapot? 't Briefje verlore? D'r
aessem piepte. O, was t'r mae wien, 'ier, noe. Docht je dat de kolonel
dat zou gelove?
Mee d'r rechtsen 'and aaide ze vorzichtig over de man z'n schouwer,
langs z'n aerm naè benee. Wat zoue ze mee z'n doee?
De kolonel. 'Oe 'ao d'n dat ook gezeid? 't Landsbelang vergt offers,
mevrouw Van Dalen. Ie ao z'n 06-nummer op een papiertje gekrabbeld
en 't in 'eur 'anden gedouwd. De leste weken waere d'r die lui van de
geheime politie in Sorek 'aodde geziee - vor 'eur natuurlijk.
noe nummer 18 I