't Landsbelang
D'r vienger lag noe tegen z'n poise. Ze voelde 't bloed kloppe, rustig en
regelmaetig. Wat een kalmte goeng d'r van z'n uut...
't Was ondraeglijk.
Was de wienflesse d'r mae, net as gister en eergister en aolle aevenden
naedat de kolonel geweest was. 'Dien rotten drank', ao Sim gezeid, toen
at n de flessen zag. 'Wacht mae, ik wete een betere afleidienge.' Den
dag was joenk geweest toen at n binnenstapte en even ao ze vergete...
24
I noe nummer 18
Even...
De kolonel.
Noe sloog ze 'eur lienksen aerm om z'n lief. Ie knorde zachtjes in z'n
slaop, ze 'oorde 't dudelijk. 't Landsbelang... God-in-den-'emel, 't lands
belang...
Paniek.
Daer was 't briefje. Neê, geên ienkel defer was onduudelijk geschreve.
D'r telefoon lag open en bloot op 't kastje - daè leide ze n ommers
aoltied as ze...
Gek dat d'r 'anden noe nie trilde.
Nul. Zes. Vier. Drie
'De kolonel.'
'Met Delila. Het is gelukt, hoor. 't Is er af en hij slaapt.'
'In orde. Niks doen. We komen eraan.'
Ze drukte op de middelste toets en leide 't apparaat op 't plekje van
daènet. D'r tweê-beie 'anden sloog ze beschermend om de slaopende
man 'eene. In d'r 'oöd begon ze te repeteren wat as ze zömedeêm zou
zeie.
Simson, Filistijnen in de kaemer.
Simson, Filistijnen.
Simson.
Simson.
Was t'r daè noe toch een strienge 'aer uut die vuulniszak gevaalle?