't Zit in de poten
Marco Evenhuis (Souburg)
Of at 't noe echt officieel is, weet ik nie. Mae verbaeze dee ik
me d'r toch wè over: Souburg eit de 'oógste tuuntjesdichteid
van 'eêl Zeêland.
'Ier vin je per inweuner de meêste vierkante meters lapjes, tuuntjes,
kroeterietjes, 'ovenierienkjes, oftewel volkstuuntjes. 'Oorden ik zeie.
Een rondje rond 't durp mee-een camera moch uutsluutsel brienge.
'Oevee tuuntjes zoue d'r noe feitlijk weze? Ik kende natuurlijk de grotere
complexen wè. Bie Rooie David van 't Paradies leie een drie'onderd
tuuntjes. An de Deinsvlietwegt leie d'r ook een slordige tweê'onderd-
vuuftig. Dae buten zoue d'r nog een paer kleinere complexjes moete
weze. In 't durp zelf.
Een paer, docht ik toen nog. Een uurtje deu 't durp fietse en ze aol op
de foto zette, docht ik toen nog. 't Za wè weze. Tweê daege intensief
speurwerk leverde een uuteindelijke schattieng op van zevenonderd
tuuntjes (op tienduzend inweuners!) verdeeld over een stik of vuuftien
complexen. D'r bin d'r grotere an de Doenkerewegt, de Deinsvlietwegt,
de Loödwegt (op 't randje van Souburg tegenan Ritthem), an 't spoor,
bie Abeêle. De kleintjes in 't durp vin je achter naebie elk 'uzenblok
bezuuen de Kanaalstraete en den Burg. Van Turnhoutstraete,