sen, want aolles wat er gezeid oort kan misschien nog nuttig weze. Om
't tegen te 'ouwen of juust vo mekaore te kriegen. 't Is mae net in wat
vo positie of je verkeert.
't Val tegen, d'r is alleênig maer een plattegrond en dien is nog nie 's 'eêl
ingevuld. Een ambtenaer van de gemeênte leit 't uut. Waer of de wegt
komt, mae dat wist iedereên a.
Neê, 't gaet om de kavels, 'oevee en wat vo soort. Over eên dieng is n
dudelijk: de wegt moe betaeld ore van de bouwgrond. Dat betékent vee
vriestaende 'uzen op dure bouwgrond.
'Oevee? Dat is nog nie beslöte, daer gaet de gemeênteraed over. En, laet
n wete, "D'r moe ook nog wat ruumte bluve vo sociale woningbouw.
Dat kan nie te vee weze, want anders komme de kosten van de weg d'r
nie uut."
Verder vertelt n: "Dat er ook nog énig archeologisch onderzoek gedae za
ore."
Ongewild valt 't even stil. De woorden gloeie gewoon nae in de zaal,
maer d'r reageer niemand, zelfs geên kwienkslag. Zierikeê is nog te vers.
Ook zeit n dat d'r een stik van 't nieuwe plan geên eigendom is van de
gemeênte. Een projectontwikkelaer was t'r eerder bie. Dien wil best
meewèrke an den invullieng van 't plan, op voorwaerden.
Ie wilt in een weitje verderop een woonzorgcomplex neerzette, vor ouwe
mensen. "Ze wille aolmaer eerder beginne mee staepelen," ik kan de
gedachte nie onderdrukke.
't Territorium
De commissie 'oort 't an en laet 't achterste van de toenge nog nie ziee.
't Is nog maer informatief en nieuwbouw, daer is vraeg naè, dat wete ze.
Maer dat complex, op die plekke, dat vinde ze nie vo den 'and legge. 't
Is zö vérre van 't centrum. D'r moe nog maer 's over gesproken ore, as
t'r meer over bekend is.
't Volgende punt. Massaal riest de tribune op en loopt naè den uutgang.
Ik kieke op m'n 'orlogie: 'alf elve. Laet ik maer meelope, dienk ik. Morge
vroeg wi wèrke. Eên dieng 'ebbe ik wè begrepe. De tied dat ruumtelijke
ordenieng een legpuzzel was, is vobie. 't Is een schuufpuzzel g'ore en as
je weinig of niks te schuven eit, dan vreêze ik da je vroeg of laete uut 't
patroon verdwient.
noe nummer 19 I