Googlebaor kanaol
Charlotte van der Wiel (Aernburg)
Wa kunn gróte mènsn toch kinderachtig zien, ee. Wa zeg 'k? Een 'eêl
land zelfs. Ik lees naomelijk net iets over 't Leopoldkanaol en da
kanaol dankt z'n bestaon an 't feit da wudder Nederlanders zö flauw
zien gewist om de afwaoterieng af te sluutn voo de Bèlgn toen a
zudder onafhankelijk wiern. Geên Vlaoms waoter deur onze kanaoln,
lekker puh. Dus aol da Vlaoms land onder waoter vansèlf en dao
most wat an gedaon. Zodoende kwam daor 't Leopoldkanaol.
Ik èn eevn gegoogled en ik kan je verteln da 't kanaol gegraovn is
tussen 1846 en 1848. Of tussen 1843 en 1854, 't is maor net welke
website je bekiekt. Ook over de lengte bèn de meêniengn verdeêld;
ofwè 43, ofwè 46 kilometer. Ik èn 't nie naogemeetn, sorry. Ik maok
'r wel een keêr een wandelieng mao 43 danwè 46 kilometer is mien
een bitje vee van 't goeie. (Ik mag dan wèl in Nijmeegn weunn maor
de vierdaogse èn'k nog noöit geloöpn).
't Is hoe dan ook 'n prachtige plekke. Ik kan dao wè foto's bluuvn
maokn. Ik ben noöit zö voo angelegde natuur maor 'iervoo maok ik
een uutzonderieng. Die strakke rijen boömn langs da kaorsrechte
kanaol, 't èt iets plechtigs, 't Is of da je deur een kathedraol loöpt, de
takken boovn je'n 'oöfd vurmn een enorm gewèlf. In plekke van
wandeln zou je bienao schrijdn gliek een bruidje naor 't altoar.
Op internet kwam 'k ook nog wa te weetn over de Siphon. Ik docht
dat de Siphon een restaurant was bie 't Leopoldkanaol. Dat is 't ook,
maor noe weet 'k waor die naom vandaon gekomn is; daor waor 't
I noe nummer 23
restaurant staot, kruistn vroeger 't Leopoldkanaol en 't evenwijdig
loöpende Schipdonkkanaol (de Blienker en de Stienker! Ik verzin 't
nie, lang leve Google) de Damse Vaort. De kanaoln wiern zö ange-
legd, dat ze onder de Damse Vaort deu liepn en die constructie wier
de Siphon genoemd. In de tweêde wereldoorlog is de Siphon opge-
blaozn mao 't restaurant de Siphon is t'r nog aoltied en ik èn 't ver
moeden dat daor nog noöit iets is veranderd.
'Eêl Vroeger kwaomn me vaoder en moeder daor al en overlèst zien
me moeder en ik d'r weer een keêr gaon eetn. 't Was zeker 25 jaor
geleejn da ze dao gewist was en noe liepn d'r nog gliek dezèlde
obers rond! De menukaorte was ook nog niks veranderd en de
clientèle evenmin. De tied ao stil gestaon bie de Siphon. Ik vond da
een 'eêl geruststellende gedachte, dat 't kan: d'r zien plekn waor de
tied stil bluuf staon. Dus a je noe nao 't leezn van dit ver'aol in
paniek dienkt: "Internet? Google? Website?" Gaot dan lekker gaon
eetn bie de Siphon en maok as toetje een wandeliengetje langs 't
kanaol. Maor vergeet je fototoestel nie!
