Jeugdherinneringen van Wannes van Janna uut de dreve in Oosterland (slot) De voorbereisels begonne a deu' an de vrouwe te vraegen 'oe of 't mit d'r gesteld'eid was, want was ze ongesteld op d'n of'esproken slachdag, dan kon 't nie deugaen. Kreeg een volwassen dochter op de slachdag onverwachs de regels dan mos ze - tot 't verreke in de tunne zat - dien dag deurbrienge in een ander gezin. Want dan deugde d'r aesem niet in zou de slacht bedérve. As de man contact had op'enome mit de slagter, wier aoles klaer'emaekt. Bossen droag tervestro wieren 'ereed 'emaekt, in 'n stik brand'out om het stro onder 't branden op de goeie plekken te briengen. Moeder de vrouwe zurgde vöo 't reuzel'outje, in de stok om de woste op te 'angen in dat was dan de koppespinvaeger. D'r wiere slachtdoeken op'ezocht waermee 't binnenste van 't verreke wier uut'droagd, in de emmers laege 'erêed op 't test'ein. De sliepplanke dï nodig was om de dunne dermen te schrepen, in die as ze uutwasse waere, 'evuld wiere mï woste. De pikketel om waeter uut de welle te scheppen, 't stermien in de keulse potten vö d'n 'uspot. Aol wat meer diene kom stong greed, zelfs de mellektesten moste d'r an te pas komme. Bie de vrachtrieër wier 15 pond zout 'ekocht, wat die in de slachtied in voorraad adde, in in de wienkel peper. Je most nae d' 'erreberge om flessen brandewien, in d'r wier zelfs 'n 'allef pond koekjes 'ekocht voor bie de thee. Niks wier vergete. In dan kwan eindelienge de gróte dag. De korrewaegen kwam uut 't strokot. De spektunne wier neer'ezet in daer bovenop stong dan de wóstebak. Zo rond acht ure, of om één ure, kwam de slagter, in was 't grote ogenblik an'ebroke. 't Vérreke ao al in geen dag mee eten 'e'aöd om de derremen zo léeg meugelik t' 'ouwen, 't Deurtje van 't verrekeskot wier ope 'emaekt in deur de loap wier 't beesje nae buten 'e'aeld in kreeg een touwe om z'n rechter achterpoat. Dan most'n nae 't slachtveld Ioape om dae an z'n endje te kommen. Dat lópen gieng niet altied even makkelik, in 't vérreke wier dan óak meer 'edouwd dan dat 'n liep. Onder vee' tegenstribbelen in geschreeuw wier 'n dan onderste boven 'etrokke in deur de keelsteek van de slagter kwam 'n an z'n ende. De korrewaegen mit stro stieng er óak in dan wier 't vérreke van onder tot boven 'ebrand om z'n 'aer kwiet te raeken. Daernae wier 'n op de lege korrewaegen 'e'ese in tuus 'ebrocht voor de verdere afwerkinge. Eest gienge de sluven van z'n poten. Dae stienge de schoolkinders al op te wachten. Ze dopten z' in 't waeter, schuurden ze langs de muren schoon, in konne d'r dan 'n 'ele middeg op kluve. Boerenschuur, Lange Achterweg, Oosterland. 82

Tijdschriftenbank Zeeland

Stad en lande | 1989 | | pagina 20