Waeter bie de wien..
M'n zouwe rond Parijs' éne t'rug gae naer uus.
Noe ad m'n maot nooit véé aest. Die leefde, in
dae was'k wè 'n bitje jeloers op, bie't moment.
Z'n filesefie was: gistere is geweest, op mèrrege
ei je gin greep dus léve doe m'n noe! Ik bin
meer 'n jakkonte. Naer uus? Dan naer uus, in
gauw oak! Zo waere m'n 's aevens pas in
Fontainebleau. Dae zouwe m'n dan ma de nacht
deubrienge. In Fontainebleau was - in is t'r nog
- 't Hotel de Londres. Toentertied a èrreg deftig
in mien öögen. Vandaege d'n dag is dat spul
êêmae gin spek mi vó m'n bek. 'k Gloave da z'r
vier sterren op nae ouwe. Eer datje dae je gat in
'n pluuse stoel kan laete zakke. ka je êêst wè
nae de kleermaeker gae in krom van de daelders
nae binne strompele. Kiek. om negen uure 's
aevens an te kommen in zö'n bedoenieng, dae
binne ze dae binne nie zö gröös op. Zeker nie as
't ma vó 'n nachje is! D'r voalt dan ma weinig
mï an je te verdienen d'r most dus wat op
gevonde worre om 't annémelijk te maeken
waerom m'n zö laete anspoelde. Lae m'n maot
dae noe wat op gevonde èbbe.'k Ad van
't Rampefons - m'n schrieve 1953 - 'n mooie
jas gekrége. 'n Demi - saison! Wat zei je dae
van? D'r zat wè 'n schitje op de linkermouwe,
ma dat mocht gin naem èbbe. 'k Zag d'r keurig
opgerêêd mee uut. M'n zouwe zégge da m'n de
"Foire de Lyon", de jaerbeurs za'k ma zégge,
adde bezocht. Ik was de dirrekteur van 'n
andelsbedrief in m'n moat was m'n chauffeur.
Ze konne vaneiges wè begriepe dat 't vó êên
dagje '11 pittig endje rieen was van Lyon nae
Fontainebleau. Dae móste ze intrappe! Zö
gezeid. zö gedae. M'n adde 't autootje 'n bitje
uut 't zicht gezet, want dae kö je noe trek nie
mee pronke. M'n chauffeur zou 't woord doe.
Noe was t'r êên dieng. daer ad 'k zö m'n eige
sombere gedachten over. M'n maot droeg
naemelijk an zó'n draegrieme 'n soort "pukkel"
van kanvas. Die kwam nog uut de
naelaetenschap van de twééde weareldoorlog.
In die pukkel zat ons liefgoed in de spullen as
m'n onderweg zellef zouwe motte kóke.
Dat gieng d'r aomae ma net in. Vanonder de
kleppe stak dan oak pertoal 'n afwasbostel z'n
aerige kop nae buute.
'k Docht zö bie m'n eige, dat was gin binne-
kommem in zö'n deftig spul... Ma, goed, 't was
nie anders. M'n zoefde deu de draoideure. in
kiek. daer waere m'n in de hal. Noe, die kö je
bekieke. Op 't donkerrooie tapijt staeke m'n
schoenen - oak a van het Rampefons - èrreg
erremoeieg af. Wat 'n dirrekteur! Op 'n Iuukse
balie stong de belle, wae je 'n jens op most
géve, wou je anspraeke ebbe. M'n moat zette
z'n velies. Goddank, uut 't zicht op de vloer in
gaf 'n dreun op die bèlle of 't z'n daegelijks
wèrrek was. Noe ma afwachte! Wat vó oneil
zou d'r verschiene. Warentig, d'r kwam 'n. in
't zwart geklêêde meneer, die ons, nae 'k docht,
'n bitje zuunig ankeek. 'n Spits smoeltje, mit
zö'n aekneuze tussen 'n paer van die stekende
öögjes: m'n wiere gewóge! Dat was duudelijk.
'k Voelde m'n eige êêmae nie op m'n gemak,
ma, 't liep aomae nog a awel af. D'r wier in rap
Frans an z'n verstand genaoid dit m'n verlaet
waere deu de grööte reize die m'n achter de rik
adde. Wat 't oak aoltied goed doet: m'n zeie da
m'n Ollanders waere in da m'n de cultuur in
andelsgêêst van de Franse êêl öög op adde.
D'r kon wè gin lachje af, ma, ie knikte
begriepend boven z'n witte strikje. Tenlangeles-
te gieng z'n bêênigen and nae 'n sleutelrek
achter z'n rik, in ja m'n krége 'n twêê -
persoonskaemer angewéze mit twêê êên -
persoonsbèdden. omda m'n "messieurs" waere.
D'r wier 'n meisse geroepe. Dat kind zag 't'r
oak a zö deftig uut. Eêmae in 't zwart mit 'n
aegelwit évaatje vó d'r schööt. Ze keek wè even
mit 'n paer vouwtjes in d'r voor - ööd nae de
"pukkel", ma dae bleef 't bie. Ze brocht ons,
over de brêêje belööperde trap nae de kaemer...
'k Ad 't gevoel da m'n in 'n sterre - ótel gienge
kampêêre. 't Aerige ööd van de afwasbostel
zwaoide vó m'n neuze in de schemer van de
plefonverlichtieng, bèl. bèl. wat 'n stik wèrrek!
Bóve gekomme kwam d'r 'n ènde gang, in kiek,
dae waere m'n d'r. Gerdienen tot op de vloer.
B'angsel of leer, mit goud gebiesd, prachtige
spiegels, spreien van satijn, mahonieoute taefel-
tjes in stoelen mit van die gekromde pootjes, a
waere 't danseresjes, 'n badkaemer in 't groen
uutgevoerd mit oalles d'r an in d'r op.
492
