Ze zette snel de pas er in
En duuke bie thuuskomst aol de kelder in.
Moeder Kaotje, afkommend op 't geluud,
Roept: 'Komme julder daer es uut!'
Daer staen de bolussen dan:
De kelder ruukt er zo mè lekker van!
Kaotje ei 't stik druk noe, dat begriep je wè,
Ze mog wè twee paer anden
Ze rent en zwaoit mee der keuzen
Der tute 2) angt op d'r neuze.
Daer komt noe zovee kieke:
Twee ronde mussen moe ze strieke,
De veerewaegen kröone 3),
En de guus nog wasse en verschöone.
'Vooruut! Je schoolgoed af 'elee,
En dan eest d'oenders eten geel'
Ze ebbe bliekbaer nog a zin,
't Is toppunt, dat ze zo gewillig bin.
Eindelijk is d'aevend an 'ebroke
Ze bin in 't schoon ondergoed hestooke,
Noe gauw nog nachpons en 'ansoppen an
En sprieng gauw in de bedstee dan!
Ze kriege niks gin licht:
De deurtjes gaen potdicht.
's Ochensvroeg bin z'a an 't vitten
Wie of t'er op de voorste bank moe zitte.
Maer moeder Kao maekt korte wetten
Deu ze aol an 't werk te zetten:
Ze moete koeken en limenaode draege
En de banken van de veerewaegen.
Dan kroonen de joengers mee ter vaoder 't paerd
En vlechte linters en rozen in maenen en staert.
Onderwiele ei Kaotje aolles klaergezet
En ael ze 't Zondags goed uut 't kammenet,
Ze kunne noe óp ge reeë 4)
't Is nie eenvoudig, mee z'n zessen kleeë!
Betje, die doe zo dom,
Die stompt een klokje 5) waeter om.
Der schoone musse wor nog net
Van de waetervloed gered!
En dan is 't er wee wat mee Piet,
Die is ineens z'n gouwe knoppen kwiet!
Ze komme uut Wimpjes broekzak voo den dag:
'Stout joenk, je weet, da je dat nie mag!'
Wie 't eeste klaer is noe
Brieng Wimpje naer de buren toe!
Dat bin Kees en Siene dan.
Daer gaet ze, een gloednieuw jakje an,
Kees: een nieuwen 'oed op 't ood
Die is nog iets te groot,
Maer dat is gin bezwaer
Want dan past en 't volgend jaer.
