Zie zoo! Paer en waegen staen gereed om vort
Achterin een zak vol kort 6),
Want je moet nie vergete:
Ok een paerd moet ete!
Jan zit a op de bank
Mee de liende 7) in z'n and,
Z'n kroost dat zit er ok a bie
Alleen der moeder is 't er nie
Want Kaotje ruumt nog ier en daer
Toet Jan roept. 'Bin je klaer?
Mens! Wat jie toch als mè spookt,
'k 'eb al een segaore op 'erookt!'
Aestig kom ze an,
'Vort mè, Vosje, rieë dan!'
't Gaet in snelle draf
Op 't durp mee schoolguus af.
Kaotje laet d'r gedachten gae
En peinst. 'Eb ik 't oliestel wè uut hedae?'
Op 't durp is 't een drukte van belang
't Is een geloop en een gedrang!
D'r stae al wè twintig waegens vo de toer.
Ze sluute an en komme achter Brand, de kooleboer,
Diens kinders binne vee luudruchtig
De man vermaent ze dan ok duchtig.
Van aole kanten rolle waegens an
De reeke 8) wordt er als mae langer van.
Ze bin zó mooi gekroond en opgesierd
Of de koningin d'r verjaerdag viert.
De meester ei 't zó druk, 't is bar,
Z'n aer is 't er van in de war,
Dat striekt 'en iedere keer,
En ie vliegt de waegens op en neer.
Je ziet um telken mee wat guus verschiene
Die dan wee onder een uuvetje 9) verdwiene.
'Ee, kiek', zei Kees, 'ie kom naer ier
mee Lou en Neele van de kruudenier!'
Ze worre d'r nog bie hestopt,
't Zit noe toch wel wat volgepropt.
Eindelijk is aolles opgesteld:
Drie en veertig waegens bin geteld.
Ieder moet een nummer draege
Dat kom dan voor an ied're waegen.
De meester is in nummer één gebleve
En eit 'et sein voo het vertrek gegeve.
D'r komt beweging in de stoet.
Toch gaet 'et nie, zöo as het moet,
Want het paerd van Eine Brand
Ouwt in bie iedere kooleklant!
En as 't er één nie verder wil
Valt ok de achterhoede stil.
Doch buuten 't durp kriegten het goeie woord
En draefden aolles lustig voort.