De guus zwaoiden naer aolle raemen
En brulden nae ieder, die ze tegenkwaeme.
't Is prachtig weer! De zeiltjes opgerold an ied're kant.
Ze kun dus lekker kieke over 't land.
Die Neeltje eit een tasse zo bol was wat!
Piet docht, dat die vol pepermentjes zat,
Maer toen ie vroeg, wat of 't er in was
Zei ze: 'M'n omslagdoek en Lou z'n jas!'
Dikkels staen der mensen an de kant
Die zwaoie mee ter 'and,
Lou knikt dan minzaem nae de schaere
As of 't z'n onderdaenen waere
Hoera! De Lange Jan komt in 't gezicht
Den aene schittert in 't zunnelicht!
Vlak bie de stad daer mindere ze draf
En buuge stapvoets nae de Siengel af.
Daer gaen ze an de liende trekke
Want ier komt d'eeste pleisterplekke.
Ze sprienge aol de waegens uut
De Siengel gonst van 't stemgeluud.
'Wat een villa's staen dae! Moe je toch es kieke!
Ier bin de mensen toch wè rieke!
En kiek daer es! Enden op een kooie
Joengers, kom je? Kluuten 11) der op gooie!' 10)
Ze ete koeken en ze drienke limenaode
Of z'n gin daegen niks genuttigd aode.
'O', zei Jan, 'geef dat maer ier!
Ik ebbe liefst een flesje bier!'
Mee een knal gaet 't flesje open
En 't bier op Kaotjes nieuwen beuk an 't loopen!
'Sufferd! Noe eb ik je nog zó gezeid:
Dienk 't er om, dat et geschommeld eit!'
't Is Neeltje, die niks ebbe moet,
Z'is misselijk en glad nie goed,
Och, 't is ok zo een sprietig dienk,
'Kind, eet meer spek, dan wor je flienk
Dan bin de guus het stilstaen beu
En roepe: 'Rieën me noe es deu?'
Een fluitje snerpt en aolles gaet an boord
Dan rolt de stoet wee rustig voort
Naer Zoutelande, naer de groote waeterplasse,
Mee z'n aollen voeten wasse.
Bie Jan z'n waegen moeten er om beurten twee achterin
Dat is niet zo naer ulder zin,
Zodat ze gauw daer op d'r knieën streke
En elk mee één oge deur 't ruutje keke.
Dan zeage ze de guus van Teune Spruut
Die staeke dan d'r toenge uut.
En zellef groette ze dan vlug
Mee een vuuste vo Truusje terug.
Ze komme in Zoutelande zonder panne,
De paeren worre uut'espanne
