De meisjes in der lange rokken
Worre deur de badgasten uutgetrokke 17).
(Gauw beuk en kraelen goed gedae:
Je moet toch prontjes op de foto stae!)
Kom, me gaen nog even naer het strand.
De riete badstoelen staen an de kant.
De badkoesjes (ze maeke der gin gebruuk meer van)
Ze staen verweerd, mee laegen roest d'r an.
Daer gienge vroeger de rieke dames in ontkleeë,
Dan trok een paerd de koesse in zeeë,
Uut 't oge van de mensen sproenge ze in 't soep,
In een streepjespak en mee een musse op.
Vroeger schaemde ze d'r eigen vo 't publiek
Mer noe lope ze naekende te kiek!
Nog even langs de dune tot besluut
En dan komme me langs een padje bie 't café weer uut.
O, stil even! Nu niet gestoord:
De voorzitter van 't schoolbestuur is an 't woord.
Ze staen d'r aollemaele rond.
Ie neem z'n kromme pupe uut z'n mond,
Z'n oorriengen zwaoie 'een en weer:
Ie zal het kort maeke deze keer:
'Ouwers en kinders, j'ebbe vandaege weze rieë,
Me vee genote en vee gezieë,
Ik 'ope, dat in julder laeter leven
Deze dag nog in herinnering zal weze'
Ie dankte ieder, zo as 't 'oort,
En richtte tenslotte nog het woord
Toet Ko de Brune, je weet: diens tanden bin in zee gebleve,
Daer is 't um daenig mee ontreve 18):
'Noe wou ik julder vraege
Kunne me de schae nie saemen draege?
Vinden je 't aollemaele goed?
Dan zal ik rondgae mee men 'oed'.
Instemmend handgeklap en ieder trok z'n beuze
En gaf toen iets nae keuze.
Toen aolles was vergaerd
Was Ko's gezicht glad opgeklaerd,
le eit een woord van dank gesproke
En 't geld in z'n tabaksdooze gestoke.
Dan alleman weer instappe
Dan begint de leste etappe.
Gevaerlijk is 't nie op de wegen
Want auto's kom je 'aest nie tegen.
Ze moete één keer nog de reis onderbreke
Om aol de keerslantaerens an te steke,
Want toen ok gold de wet:
Wie gin licht eit, wordt er ópgezet!
Ze ete en ze drienke nog wat in dien tied
En raeke zo de restjes kwiet.
't Wordt al kil, as men vertrekt
De vrouwen zwaoie de aevenddoekjes 20) rond der nek.