RIEKS
tekst Katinka Polderman
jie noe nog krentebollen?'
'Nea, die wazze a bie Roosendaal op. Ei'j'oenger?'
'Ontaert. 't Is nohha een Bathse reize twea en
ollef uur in d'n trein voor a je es op dat station stit.'
'M'n vrouwe ei noh we bolussen mee eheve, mè
die wazze eihelijk voe op de terugweg.'
'Me wachte wè op zo'n karretje dan, mie koffie
en koeken. En aars ze in Amsterdam zeker wè
wat.'
'Ja ja. Di zitte me dan.'
'Lekker a me een dagje vrie konne kriehe van de
Sagro.'
'Ja, en dat hewoon op een diesendag. Dat Rieks-
museum, di mójje ok nie weeze op een zitterdag.
Veeste druk.'
'Me zu toch nog wè tied om even een pilsje
te doen bie die bar mie die lekkere wuuven mie die
bikini's an?'
'Ik ehoare attet ieselijk hroat is, nog hroater as
voor de verbouwing. Ze rie d'r hewoon mie de fiets
onderdeur, je mó di uutkieke ajje nie van je sokken
ere je wor. 't Is mie oal verdiepingen en zalen en
diengers. Zo hroat as wè vuuf velden van SV Apollo.
Attet d'r hin zesse bin. A je der uuuuren rond kan
kieke en dan nog nie oales hezien eit.'
'Een bitje zoas t museum in Hoes?'
'Néand jong, véé hroater. Weet jie a watta je wil
zie?'
'Der ang di wat van Jan Toorop, mie een boere-
wuufje dat a an 't breien is. Iederean ken t'n van z'n
Jugendstill, van z'n litho's, ok mooi natuurlijk,
mè dat Zeeuws misje, da's biena pointillisme. Dat
wil ik noe wè es van dichtbie zie.'
'Nou, jie weet er wè vee vanof or. Mè kiek wattak
'ier vinde in m'n tasse: Fruitella! Mó je een Frui-
tella? Ier, een rooien, die binne 't lekkerst.'
'En jie dan?'
'De Nachtwacht wil ik eal hraag zie.'
'Dus dan Toorop en De Nachtwachte en dan
himme ni die lekkere wuuven?'
'En oales mie Michiel de Ruyter d'r op. Da's ok
nóhha wat oh.'
'En dan ni die lekkere wuuven een pilsje drien-
ke. Di bie 't station, mie die bikini's an.'
'D'r binne ok kleine boatjes, persies zoas attet
d'r toen uut zag in d'n tied van Michiel de Ruyter,
mè dan in 't klein.'
'Dus dat dan, en dan ni die lekkere wuuven.'
'En dan nog de diengen die a hin kunst bin, die
ze ók. Iets mie een hraaf of een stad'ouuwer, de
kohel wirratten mee doad 'eschote is in Steen, die
ze d'r ók. En z'n 'oed en z'n emde. En a me dat
oal 'ezie zou ik ók nog wè een mooie poster wille
koape. In de wienkel van 't Rieks. Van Michiel de
Ruyter. Voe in de keete.'
'En dan ni die lekkere wuuven?'
'Dan mó me nirruus, wan vaneavend is 't voetbal
op TV. Jie nog een Fruitella?'
32 Zeeuws Tijdschrift 2013 3-4
